Lapsus linguae

"Gulli betri"

2008-04-26T19:59:00.003Z

-já, Gulli betri eða hugsanlega gulli betri. Hitti Gulla síðdegis í fermingarveislu, þeirri fyrstu sem Halur hefir í farið árum saman, já hann Gulli er ekkert blávatn. Einhverjir kannski farnir að þreytast á honum en hann er með hluta gömlu snilligáfunnar innan borðs, sem sagt ljóðmælin, frásagnargáfuna; það var þegar talað mál eða ritað var það sem miklu (mestu) skipti. Hann bað auðvitað að heilsa Guðjóni bróður, sem minnti hann á það er hann sjálfur mundi ekki eða gleymdi (og það gat verið margt). Það sagði Hali maður fyrir nokkru sögur af Gulla áður en hann veiktist; hann var ekki venjulegur maður. Ennfremur góðmennskan uppmáluð. "Gleðstu yfir góðum degi, gleymdu því sem miður fer" var eitt af því sem Halur mundi rétt af því sem hann fór með síðdegis; höfundur hinn gleymdi Heiðrekur frá Sandi; mann þann sá Halur á sínum tíma norðan heiða eins og nokkra aðra frá Sandi síðar. Gulli hefir að manni sýnist farið eftir einhverjum álíka linum í lífinu. Hann Gulli frá Hraukbæ er sko enginn venjulegur maður og orðinn 75 ára síðan í fyrra. Hann ætlaði að skrifa bóndanum í Bjarmalandi nokkrar línur.

Sumt er algengt

2008-04-04T20:10:00.004Z

verður eða telst, verður á stundum "verðlaust" í eiginlegri merkingu og þá í hróplegri mótsögn við óskir eigenda. Einu sinni var fínt að eiga útlenska bjórdós, jafnvel kókdós. Á Íslandi hefir hönnunaræðið gefið Hali tilefni til slíkra vangaveltna; einnig kaup á bensín- eða díselfákum. Það að aka framhjá Arnarnesinu og sjá fúnkíshús með tveimur reinsróverum svörtum utan dyra (kannski þeir séu einnig í stofunni) er svipað og sturta niður úr salerninu og þá sama hvort harðlífi eða skita sé þar á ferð. Svipað og verra eru nýju íslensku "skurðstofueldhúsin", jú, Halur nefnir þau nafni því þar sem þau minna á skurðstofu að flestu leiti og í leiðinni dauð hönnun, dautt fyrirbæri. Þó ef væri ekki nema ein sveigja, þá litu sum hver skár út. Hvað þá rispa eða ójafna. Ekki batnar það þegar sömu "inn"-húsgögnin eru alls staðar nema hvað!? Sjálfsagt sígild sum hver á sinn hátt en þola ekki meir. Það er hins vegar til einskis að deila um smekk.

Ágætar

2008-03-28T20:11:00.003Z

fréttir af klakanum milli þess sem hrærigrautur svartsýnis og myrkurs grúfir yfir "íslenska undrinu" eru nauðsynlegar. Bob kemur í maí. Það er ekki til neins að deila um smekk, en hann er lifandi goðsögn að mörgu leiti og aldurinn farið vel með'ann; frétti í gær af tónleikum sem einn kunningi í Skagafirði fór á í Danaveldi f. 1-2 árum; bjóst ekki við neinu af gamla manninum en fullt stuð í 2 klukkustundir hið minnsta. Ekkert annað en skyldumæting, enda reddaði "eini vinur Hals" miða. Hafi hann þakkir ágætar fyrir en í staðinn verður það lagt á hann að fylgja Hali suður eftir. Bob hljómar undir skrifum þessum. För í Skagafjörð í vikunni hressti Hal mjög að sumu leiti þar eð hann hitti að minnsta kosti einn órigínal bónda úr Húnaþingi sem m.a. notaði orðið "allavega" á sama gamla hátt og Halur gerir, það er sjaldan að Halur verði vitni að slíku og öðru eins. Hann var með heimasmíðaðan staf, gerðan úr járnstöng og þungur mjög, hálfgerður atgeir. Halur spurði hvort ekki mætti lemja eitt og annað með stafnum og bóndi svaraði að nýlega hefði hundshelvítið verið með mink í kjaftinum en eigi við ráðið. Tók hann þá stafinn og lamdi með einu höggi í hel minkinn og sagði: "Þolir ekki mikið þótt grimmt væri" og undir það síðasta þegar Halur var að nótera hjá sér: "Mikið skal skrifað um skoffínið". Svo mörg voru þau orð en gott hefði verið að ræða við bónda a.m.k. (í dag segja flestir allavega í staðinn) í 2 klukkustundir; eigi var tími til þessa þá stundina, því miður. En Bob kemur.

Stundum næst

2008-03-20T20:58:00.002Z

betri árangur með því að eyða lengri tíma í eitthvað; besta dæmið sem upp í hugann kemur er auðvitað kaffilögun. Eftir að Halur fór að drekka eingöngu kaffi sem hann malar sjálfur í eigin malara og þjappar hæfilega áður en kaffið er sett í handfangið sem aftur er sett undir sturtuhausinn, þá hafa opnast nýjar víddir. Ókosturinn reyndar sá að hann drekkur ekki eða varla kaffi annars staðar en heima; iðulega gerir hann ráðstafanir (aðeins ýkt) til að laumast í einn bolla milli annarra verka eða áætlana. Loks er það sjálft kaffið, en allir eiga sína uppáhaldstegund. Leitinni er löngu lokið hjá Hali; hann drekkur aðeins og hefir gert á þriðja ár kaffi frá Ítalíu, kaffi frá Caffe Ottolina og hann mælir sérstaklega með kaffi þaðan, það er einstakt, unnið eftir ítölsku aðferðinni. Og fæst meira að segja á Akureyri! Að drekka bolla af heimalöguðu espressó er ekki ólíkt því að hafa landað (og síðan sleppt) sterkum urriða á litla flugustöng; það er ekki stærðin, aðeins gæðin er máli skipta.

Ekki næst alltaf

2008-03-20T20:41:00.002Z

betri árangur með því að eyða minni tíma í einhvern ákveðinn hlut eða starf, verkefni eða hvað eina sem hver og einn vill nefna. Halur hefir lengi verið þeirrar skoðunar að mikið af því sem gert er, megi gera öðruvísi, á annan hátt, sérstaklega þó hraðar, á skjótvirkari hátt. Stundum tekst það, stundum ekki. Mýmörg dæmi má nefna eins og fundasetur, fundastjórn (-leysi), drepa mann lifandi með illa undirbúnum, óþörfum fundi, margmennum fundi, drepa með löngu erindi, fyrirlestri (efnið löngu tæmt), mörg er sú vitleysan og misjöfn. Halur hefir þjálfað sig í mörgum verkum á þann hátt að þau má gera betur en samt hraðar, en áður. Lítið dæmi er tími sá er hann eyðir eða notar til leikfimiæfinga, hlaupaæfinga, styrktaræfinga og álíka. Hann hefir það vel skráð að árangurinn hefir aðeins aukist, batnað, þrátt fyrir að skemmri tíma sé varið til þjálfunar. Sem sagt gamla skynsemin að nýta þann tíma sem aflögu er eins vel og kostur er. Loks koma upp atvik þar sem eyða skal lengri tíma en ella til að njóta; það er allt önnur saga.

Eitt fárra

2008-03-16T13:34:00.002Z

norðlenskra fyrirtækja, já norðlenskra, sem ennþá eru ofan moldar er Skíðaþjónustan. Hú hefir lifað af í ölduróti verslana og fyrirtækja norðan heiða. Oftast opin, þjónustan þægileg, selja reyndar helst það sem "flestir þurfa", minna eða ekkert af öðru, geta þó pantað, unnt að skipta út gömlu fyrir nýtt eða nýrra eða stærra, mörg börn hafa vaxið upp með slíku. Auðvitað geta allir hafa álit á Skíðaþjónustuni, en hinu verður ekki neitað að hún verður að teljast nokkuð einstök í sinni röð, hvort heldur innanlands eða utan. Og hver væri nú staðan ef engin væri Skíðaþjónustan norðan heiða?

Tungumálið

2008-03-09T15:19:00.002Z

er skemmtilegt mál, viðfangsefni. Sérlega ýmis samsett orð, einnig venjur varðandi eignarfallsendingar, allir þekkja slíkt mætavel. Ætíð ánægja samfara því að sjá eða heyra orðið ástarpungur yfir bakkelsi af ódýrari tegundinni (nema ef keypt skyldi í bakaríi á Íslandi). Skiptingar orða sem samsett eru gefa marga möguleika á skilningi jafnt sem misskilningi. Lítum t.d. á orðin "heimsendir" og "heimsenda". Í útvarpi mátti heyra "munið heim-senda atkvæðaseðla" eða voru það "heims-enda atkvæðaseðlar"? Átti að greiða atkvæði með heim-sendum seðlum ellegar um heims-enda? Raunveruleiki og skáldskapur ruglar iðulega reitum, ekki síst á Íslandi. Heimsendaspá vofir yfir landinu ef mið er tekið af lestri opinberra gangna. Sjálfsagt er það engin nýlunda.

Opnast

2008-03-02T13:41:00.002Z

nú brátt nýr heimur, heimur geisladiskasafnsins, sem taka skal hendinni í vegna breytinga í innra rými Vinaminnis; mörg hljóðkorn munu þar leynast og gleðja næstu daga og vikur. Það er nefnilega svo að nálgun tónlistarefnis á hörðu formi (vínýll eða CD) hér á Akureyri er svona eins og fyrir basilíkumelskandi mann/kokk að notast við þurrkað í stað fersks; það vantar bókstaflega allt sem máli skiptir, sérlega ferskleikann, annað en það sem "vinsældra nýtur á klakanum". Auðvitað bjargar netið Hali, en tilfinningin gamla að að fara í búð og kaupa plötu er ævilöng gleði eða eign. Svipað er að horfa á snjóinn í Fjallinu, en ekki getað rennt sér á skíðum þar sem hann er! Komast í snertingu við efnið, snjóinn, basilíkum eða annað, upplifa hlutinn sem sagt. Enda er lífið of stutt fyrir lélega og leiðinlega tónlist. Hvað þá þegar mónóblokkirnar eru skrúfaðar upp; þá er gaman. Hvernig skyldu þær hljóma með vínýlnum?

Hlaup

2008-02-29T20:03:00.004Z

og hlaupársdagur hefir ætíð verið í uppáhaldi hjá Hali, allt frá fyrstu tíð og lengi vel óskiljanlegur dagur; kannski það sem hefir gert hann svo eftirminnilegan. Það er erfitt að vera bæði sterkur og frár á fæti, sterkur já, en í tilefni dagsins er gott að vera sterkur á ritvellinum. Sagt hefir verið að enginn verði ódauðlegur nema um hann verði eða hafi verið ritað, helst gefin út bók eða kver um viðkomandi; það er hið eina sem hefur sönnunargildi hérlendis og tekur Halur undir það að mörgu leiti. Ljósmyndir hafa ennfremur visst sönnunargildi og þegar sannað sig víða. Sagan segir okkur að sagan endurtaki sig sí og æ. Alltaf sama sagan. Halur minnist þess hversu gleðilegt var að lesa bækurnar hans Péturs Gunnarssonar, en hann er einn fárra sem ritar texta sem flæðir án vandkvæða, ekki upphafinn eða neitt slíkt, aðeins skemmtilega saman settur og hleypur áfram, vart að lesa þurfi, hann "les sig sjálfur". Ótrúlegt er að Pétur skuli skrifa í dagblað á Íslandi, en hann hefir skrifað nokkra pistla í Moggann, síðast í dag. Rekur hann sögu góða af Montaigne, sem lagði þá spurningu fyrir indjána frá hinni nýju álfu Ameríku, hver væru forréttindi "kóngsins" í því landi og svar hins innfædda var svohljóðandi:"Hann fær að fara fremstur í stríði". Sögukornið staðfestir að litlar framfarir hafa orðið okkar megin í veröldinni. Að lokum skal nefnt að lífið er of stutt fyrir langlokur! Hlaupársdagurinn er eilífur og hefir sérstöðu, alveg eins og Anton Chigurh; hann sannar eins og svar indjánans að litlar framfarir hafa orðið "vestanhafs".

Ekki

2007-12-31T15:50:00.000Z

alveg dauður, mætti segja síðasta dag ársins þar sem klisjurnar eru enn og aftur að ganga af manni dauðum. Maður ársins verður sá nefndur sem bætir og "glæðir" líf annarra. Og þá sitt eigið í flestum tilfellum. Þegar hlaupið er yfir árið á hlaupabretti líkamsræktarstöðvarinnar á Eyrinni, verður mismikil bjartsýni á vegi manns; þrátt fyrir margar mínútur af myndefni frá Pakistan eftir dauða stjórnmálakonu þar í landi, bregður manni í brún þar sem vart hefur mátt sjá nema kannski 2 eða 3 konur meðal hinna mörgu þúsunda sem birst hafa. Það minnir aftur á lítilsvirðingu kvenna og margra annarra meðal vor. Síðan furða margir sig á því að heimurinn skuli lítt batna. Halur horfir hins vegar bjartsýnisaugum til næsta árs, árs nýrra könnunarferða og verka margra af nýjum toga, sem leitt geta hann til enn betri tíma. Frelsi og virðing fyrir öllu sem bætir lífið verður haft að leiðarljósi á næsta ári og Halur þarf eins og oftast að minna sig á báða þættina. Ef ekkert er gert, þá gerist ekkert. Áfram með smjerið.

Hvað eru

2007-12-23T17:14:00.000Z

jólin annað en hefðir, venjur og vinskapur? Gott, ágætt. Samt ágætt að minna á malt og appelsín, laufabrauð og mat eftir venju eða smekk, sem sagt endurtekning er mörgu ræður. Síðan er það tónlistin og þar jú best að sleppa klisjukenndum þýðingum á amerískum jólalögum eða tilraunum sem raunakenndar eru allar; okkur nægja íslensku sveinarnir. Hali finnst þó rétt að gera undantekningu með "What a wonderful world" með Armstrong, það má kalla það jólalag, einnig Shane MacGowan blessaður sem samdi "Fairytale of New York" (með Jem Finer 1987) og er alltaf jafn gott; Sissel á sinn sess hjá sumum (öllum í Vinaminni) og Halur kætist alltaf er hann heyrir Jussi Björling syngja "O helga natt" þar sem áreynsluleysið ríkir og tæknin er algjör, enginn rembingur þar. Þessi skrif aðeins áminning um að njóta þess er máli skiptir fyrir hvern og einn, og þá mega aðrir fylgja með.

Led

2007-12-10T19:14:00.000Z

Zeppelin dagurinn er í dag; kannski ekkert sem máli skiptir fyrir marga eða flesta, en samt sem áður merkilegur dagur þar sem hrein snilld er þar á ferð innan geirans. Nokkur Zeppelinlög spiluð undanfarið og beðið um að lækka í græjunum, sem náttúrulega er ekki hægt eða erfitt. Zeppelin þarf að spila hátt. Það er skemmtilegra að horfa á gömlu albúmin hjá þeim en auglýsingarnar í blöðunum um það sem þarf að kaupa fyrir jólin, hvað þá auglýst námskeið í heilbrigðisstjórnun eða myndir sem þar fylgja, þegar vægi eða gildi einstakra starfsmanna fer aðeins minnkandi en ekki öfugt. "Allir" kvarta undan því að ráða engu um starf sitt! Kraftleysi kerfisins er í hróplegri mótsögn við kraft rokksins.

Ertu drukkinn?

2007-12-02T11:46:00.000Z

Hefurðu verið að drekka? Ertu að koma eða fara? Eftir þrýsting hefir Halur ákveðið að skrifa fáeinar línur til að létta á spennu margra, skrifa texta sem er "ekkert". Ég þakka biskupnum fyrir hvatningu og Birni Bjarnasyni. Þá næst er það gleðin, enda þeim báðum nærri. Hún er mikilvægust alls auk heilsunnar, góðrar heilsu, ágætrar ef því er að skipta. Landsbyggðarpakk eins og Halur hefir bak við tjöldin reynt að gleðjast og gleðja aðra; hann er að undirbúa myndefni sem leikið verður af honum - gleðiefni. Beta-útgáfa er í skápnum, kannski kemst hún út úr skápnum með hjálp biskupsins. Halur skorar á alla um leið og hann reynir að þrauka áfram í leit að gleðinni, að gleðjast. Gleðjast í starfi, ánægðir og glaðir starfsmenn eru mikilvægari en monní; gleði í leik og starfi. Tónlistarmenn sýnast eiga auðvelt með að gleðjast, t.d. Mugison á tónleikum nýverið. Gleði og smá tregi á milli í hverjum hljómslætti. Gleðitár.

Snobb

2007-11-18T17:38:00.000Z

segja einhverjir um blogg gærdagsins, en til að bæta gráu ekki ofan á svart, þá vill Halur minnast tveggja skemmtilegra og hallærislegra með afbrigðum karaktera úr einni af James Bond myndunum; nefnilega Mr. Kidd og Mr. Wint, sem léku í "Diamonds are forever". Stuttar og hnitmiðaðar setningar og glæpsamleg athæfi framkvæmd af kunnáttu, en allt einfalt, nærri navískt. Sjálfsagt ekki eftirminnilegir öllum eins og Stálkjafturinn (ljósaperuatriðið er sígilt með honum), en í þeim bregður fyrir nokkuð sem aðrir vart leika eftir, nærri B-mynda klassík! Oft er hún best, nærri C-inu kannski.

Óveðrið

2007-11-17T22:31:00.001Z

kemur manni stundum til að hlusta á útvarpið; svo var í kvöld er Halur fyrir tilviljun settist við hljóðvarpið og var þá sérstaklega áreynslulaus tenórrödd nærri; þar var á ferðinni rússneski tenórinn Sergei Yakovlovich (1902-1977) sem sem sagt söng án rembings nokkrar hljómfagrar og tærar aríur, minnti nokkuð áreynsluleysi sumra skandinavískra tenóra sem horfnir eru yfir móðuna miklu. Það var sérstök upplifun að halda út í óveðrið á Tuddanum spilandi Sergei í útvarpinu, sem mun hafa verið alþýðunnar vinur þar eystra, hann mátti heyra milli vindkviða og miðstöðvarblásturs. Þegar þetta er skrifað, les Klaus Kinski og syngur (singt und spricht) efni eftir Brecht; einstaklega sniðugt að geta hlustað á gamalt efni á netinu, efni sem Halur missti af, ekki hvað síst efni sem er á dagvinnutíma eða síðla kvölds. Skiptir litlu þótt þýskukunnáttan sé lítil eða engin orðin, hljómur og túlkun stendur fyrir sínu. Enda nýbúinn að vera í Berlín og mest austan megin; Berlín bíður nýrrar heimsóknar og vonandi fyrr en seinna.

Einkennilegt

2007-11-16T17:50:00.000Z

finnst Hali að "Stökur, 21. desember árið 1844" eru sjálfsagt með því besta (kannski er minnið að glepja Hal), sem Jónas orti, dæmi:

Enginn grætur Íslending

einan sér og dáinn;

þegar allt er komið í kring,

kyssir torfa náinn.

Þrjár aðrar stökur fylgja þessari í bókinni, er Halur hefir stöku þessa sótt. Sótt og úrsótt, það að láta sér batna af sóttinni, úrsótt er nýyrði í tilefni dagsins, enda samdi Jónas mörg nýyrði á hinni skömmu ævi. Úrsótt eins og afturbati.

Enginn grætur

2007-11-16T13:42:00.000Z

Íslending, einan sér og dáinn, sagði listaskáldið góða; það er náttúrulega að bera í bakkafullann lækinn að nefna Jónas í dag, en Halur telur fulla þörf á slíku. Á tímum klisjunnar, flest er fyrirsjáanlegt, flest verðlaun eins konar sjálfsupphafningar og fyrirséður vinagreiði, hins að allir séu að slá í gegn og gera það "besta sem fram hefir komið" í hinu og þessu, sumt auðvitað réttara en annað, þá er mikilvægt að halda honum til haga og nota jafnt og þétt. Lesa og gleðjast, enda óviðjafnanlegur og þá í eignlegri merkingu með innihaldi en ekki aðeins umbúðum. Halur varð var við Jónas í gönguför um heimkynni æsku hans á haustdögum; það var óviðjafnanleg upplifun, alveg eins og lesa Jónas. Sennilega líður manni svo vel að lesa Jónas, þar sem auðvelt er að sjá í hendi sér að "enginn lifandi maður" gerir betur. Þess má þó óska sér, okkur öllum til handa. Á meðan er líf í landinu. Halur tók fram Kvæði Jónasar Hallgrímssonar í eiginhandarriti, ljósprentun í góðri stærð, útg. 1965. Þar kemst maður nokkuð nærri honum. Og það er þægileg samvera.

Bjargvættur

2007-11-12T13:20:00.000Z

þess er þetta ritar er 43ja ára í dag. Það er nú ekki hár aldur enda verður frúin í Vinaminni aðeins glæsilegri og mýkri með ári hverju. Hin fátæklegu orð sem hér á blað eru færð eiga að vega aðeins upp í einhvers konar afmælisóskir. Vonandi njótum við vinsemdar, væntumþykju, visku og ráðlegginga hennar lengi enn, hún lengi lifi, húrra, húrra, húrra.......................

Vinsælar hetjur

2007-11-11T19:12:00.000Z

tónlistarinnar og sérstaklega í rokk- og poppböndum eru oftast nær söngvarar (saungvarar) ellegar gítaristar. Svipað og er með fiðluna, sellóið og píanóið hinum megin. Halur vill gera sérstaka athugasemd við þennan þankagang; hetja Mugisonsbandsins að honum sjálfum undanskildum sem lagahöfundi og afar viðfelldum manni, var án nokkurs vafa trommarinn. Hann fór hamförum og hvenær sem er mátti búast við kraftaverki í hæstu eða lægstu hæðum tónlistarinnar. Trommu-uxi. Halur fékk hugdettu síðdegis og þá ekki af verra tagi; nefnilega þá að fara ganga með bindi (áhrif frá tónlistarmönnum). Honum var nú bent á það af húsfreyju eða réttara sagt í spurnarformi, hvort hann ætlaði að nota bindi við flíspeysuna, hinn nýja þjóðbúning. Úr yrði sennilega þjóðbúðingur. Málið er í athugun. Bindin í skápnum.

Heppnin

2007-11-11T12:46:00.000Z

er stundum með Hali, og svo var í vikunni. Halur hafði séð auglýsingu um fyrirhugaða tónleika með Mugison á Akureyri fyrir nokkru en síðan verið í annarlega hugarástandi, ekki vímu þó, hinn sama dag og leikur átti að hefjast. Er hann kom heim úr vinnu sá hann svart umslag eins og geisladiskar gjarnan í eru geymdir, á kommóðu einni í gangi Vinaminnis. Var það gjöf húsfreyjunnar til bóndans og þá nýjasti diskur Mugisons, alveg að óvörum en í leiðinni innan um vellíðan og ánægju yfir gjöfinni, splundraðist hugurinn sökum tónleikanna sem hefjast áttu innan tveggja stunda. Halur er maður undirbúnings og einnig hins að láta ógert. Eftir undarlegt ferðalag með og á móti tónleikunum, var ákveðið að skunda af stað í bæinn og bíða í kuldanum drykklanga stund til að fá miða við innganginn, það var eina leiðin. Frúin með þrátt fyrir útrásarvinnu. Halur bjargaði því að unnt var að selja miða með posagræjum en það er önnur saga. Eins og oftast, þá vill Halur vera afsíðis, en þessa tónleika var hann á stað grúpp-pía, alveg fremst en lá þó eigi flatur á gólfinu eins og dæmigerð grúpp-pía ætti að gera. Um tónleikana má segja að betra var að missa ekki af þeim; aldeilis ágætir eða stórgóðir, sérstaklega ef mið er tekið af því að lögin var Halur að heyra hið fyrsta sinni. Íslenskir tónlistarmenn eru sannarlega í fremsta flokki, en tónlist Mugisons er blanda af ýmsu, ýmsu sem Halur hefur ánægju af. Sum lögin þurfa á sterkum græjum að halda, þannig að púðrið komist út úr hylkinu. Aðallega eins og oftast var þetta frúnni að þakka og er henni enn og aftur þakkað. Hún á afmæli á morgun.

Ich bin ein Berliner!

2007-10-24T18:04:00.000Z

Vonandi komumst við nú þangað (eins og aðrir gera), en þrátt fyrir að setning Jóns Kennedís hafði verið ofnotuð eða orðin klisjukennd, þá var hún nú sögð til að minna menn á frelsið ef ég man rétt. Ætíð má endurtaka slíkar setningar ef innihaldið eykur á frelsi manna eða hitt að allir menn skuli frjálsir vera. Ich bin.......verður spennandi en svo skrítið sem það nú er, þá hefir Halur aldrei til Berlínar komið. Mikilvægt að minna á frelsið þegar svo margir vilja taka það í eigin hendur, eftir eigin samvisku og undirvitund.

Gaman

2007-10-21T16:28:00.000Z

er gesti að fá; svo var í gær. Ekkert merkilegt í matinn, annað er hefðbundin kreppa. Parmaskínka með olíu og balsamediki, parmesan, sítrónu og mozzarella kúlum frá Ítalíu; síðan humar (merkilegt að öllum finnst hann góður, einnig börnum!), klipptur með skærum frá Pottum og prikum (þýskt stál), klofinn með hnífi þaðan (aftur þýskt stál), hvítlaukur, olía og smá krydd, grillaður á hinni ágætu eilífu stálgrind (fæst einnig í P&P), smá pasta, drukkinn fínn Frakki með (fæst ekki í P&P), ágætur já, - og loks mesta kreppan; grillaður ferskur ananas (skorinn með skera úr P&P) með ís og sósu! Aðeins eitt eftir; espressó (kaffi "riserva oro" og kaffivélar fást í P&P, allir þyrftu nú að bragða á því einu sinni). Svona má gera einfalda veislu í rökkrinu.
Þessi pistill var ekki styrktur af Pottum og prikum (þ.e. versluninni P&P). Svona í ofanálag sá Halur snotra snót í dag sem falin hefir verið í nokkra mánuði.

Rennsli líkamsvökva

2007-10-15T15:04:00.000Z

hefir til umræðu verið undafarið vegna þvagláta á almenningi, á almannafæri. Sjálfur fær Halur iðulega þvag annarra manna (sem og sjálfs síns!), karla og kvenna, á sig í tíma og ótíma, en aldrei orðið meint af. Það er hins vegar meingert á almannafæri, almenningi. Ísland er bráðum orðið lögregluríki; allt skal tryggja með lögum, eftirliti, eintómir eftirlitsmenn alls staðar. Þvagrennslisstokkar hafa eigi verið gerðir nægilega víða hérlendis; skömm er á því enda þvaglát iðulegast nokkuð sem verra er að skjóta á frest eftir því sem árin færast yfir. Halur heyrði nýtt orð um helgina af vörum eldri kaupkonunnar í Pottum og prikum; safarauf notaði hún yfir rauf þá sem gerð er á skurðarbretti til að fanga vökva. Halur kemur þá með nýyrðið "þvagrauf" í merkingunni að kasta vatni í þar til gerða rauf á almannafæri, almenningi eða annars staðar þar sem kasta þarf af sér, ekki þvagskál, heldur þvagrauf. Sjálfsagt má finna einhver þvagrör frá hitaveitunni sem orðið hafa afgangs í útrásinni.

The only good indian is a dead indian!

2007-10-14T10:50:00.000Z

Þetta ku vera haft eftir Philip Sheridan hershöfðingja á sínum tíma vestan hafs. Tilvitnunin segir meira en mörg orð þegar hugsað er til landa vorra er vilja breyta þjóðtungunni í ensku; ensku svona hér og þar, helst alls staðar þar sem gull er að hafa, svipað og með Indjánana. Sjálfsagt þykir gamaldag að vera á móti slíkum hugsunarhætti, en Halur telur hann varasaman mjög. Hann styður hins vegar betri kunnáttu landans í tungufærni erlendra manna. Halur vill benda á nokkur engilsaxnesk dæmi:

Vísa úr Eglu:
Ölvar mik, þvít Ölvi
öl gervir nú fölvan,
atgeira lætk ýrar
ýring of grön skýra;
öllungis kannt illa,
oddskýs, fyr þér nýsa,
rigna getr at regni,
regnbjóðr, Hávars þegna.

Hvernig skyldi nú textinn vera á löglegri ný-ísl-ensku:

Ale is borne to me, for ale
Aulvir now maketh pale.
From ox-horn I let pour
Twixt my lips the shower.
But blind they fate to see
Blows thou bring'st on thee:
Full soon from Odin's thane
Feel'st thou deadly rain.

Annað lítið dæmi sem allir þekkja (151. kafli Njálu):
Kári spurði Björn: "Hvað skulum við nú til ráða taka? Skal eg nú reyna vitsmuni þína."
Björn svaraði: "Hvort þykir þér undir því mest að við séum sem vitrastir?"
-og síðar:
"Svo mun þér reynast," sagði Björn, "að eg mun ekki vera
hjátækur í vitsmunum eigi síður en í harðræðunum."

Hvað með þetta (gömul ensk þýðing):
Then Kari asked Bjorn -
"What counsel shall we take now? Now I will try what thy wit is worth."
"Dost thou think now," answered Bjorn, "that much lies on our being as wise as ever we can?"
"And so you may put it to the proof," said Bjorn, "that I am no more of an everyday body in wit than I am in bravery."

Þessi hefir ætíð verið í uppáhaldi:
Hrappur mælti: "Hér hefir þú mikið nauðsynjaverk unnið því að þessi hönd hefir mörgum manni mein gert og bana."
Loks á nýja málinu:
"In this," says Hrapp, "thou hast done a most needful work, for this hand hath wrought harm and death to many a man."
Sleppi öllu frægari tilvitnunum frá hinum minni eða stærri hetjum.

Þegar eru tilvitnanir þessar orðnar úr hófi langar. Hins vegar er sérstakt að bera saman nýrri og eldri þýðingar saman við móðurmálið; það kemur fljótt í ljós fyrir hverju maður telur sig hafa tilfinningu fyrir.

Sumir hlutir

2007-10-13T11:20:00.000Z

breytast aldrei; einn slíkur er sá að kaupa sér plötu eða disk, enn er það nú unnt þótt flest bendi til þess að "platan/diskurinn hverfi" eins og sagt hefur verið um stund. Sennilega eru mörg góð rök fyrir slíku. Þetta er einnig eitt af fáu sem ekki er óheyrilega dýrt og jafnvel enn meiri ánægja ef hljómsveitarmenn eða einstaklingar gefa plötur út án margra milliliða eða afæta. Afar fátt endist betur og veitir meiri ánægju en góð tónlist; kosturinn sá að auðvelt er að njóta hennar; auðveldara en að lesa langan texta sem kemur þarna nokkuð á eftir plötunni. Kalla þetta plötu. Aðeins einn ókostur með öllu þessu nýja efni er sá að hafa þarf stækkunargler eða gleraugu til að lesa upplýsingar er með fylgja, en aukaatriði auðvitað. Samt sem áður er álagning enn of mikil á tónlistina á Íslandi. Stundum fer markaðurinn offari eins og í safnplötugeiranum; hvernig er mögulegt að gefa út safnplötu með Neil Young, Tom Waits eða Dylan?

Bloggfærslur

2007-10-12T22:46:00.000Z

eru kannski ein leið sjálfshjálpar, en í dag er sjálfshjálp orðin hálfgerð klisja, klisja á tímum útlitsdýrkunar og neyslu. Ekki verður útlitið étið. Urriðinn er góður, ágætur ofan við gamla skrifborðið, það lítur út fyrir að hann hafi alla tíð þar verið eins og Ingólfur Arnarson á Arnarhóli allt frá barnæsku. Urriðinn leiðir hugann að vatnsniðnum (vatnsniðinum má víst einnig rita í þgf.), árniðnum sem er svo víða á Íslandi þar sem enn renna ár og vötn hreyfast. Slíkur niður gefur ró eða rósemi hugans, nokkuð sem er ókeypis. Það að ganga meðfram fljóti eða vatni sem gefur nið, það er nokkuð sem mæla má með. Halur hefir verið að velta því fyrir sér að taka upp vatnshljóð eða árnið við ákveðna staði þar sem hann best til þekkir; staðir þar sem nægilegt er að hlusta en ekki horfa nema þegar svo háttar til. Nú er hins vegar tími til kominn að hátta.

Urrrrr-ið-inn heim!

2007-09-30T16:26:00.000Z

Handritin heim, hver man eigi eftir deginum, en þá voru á stundum fréttir fréttanna vegna. Einstaka sinnum hefur Halur beðið eftir einhverju sérstöku. Svo var með urriða nokkurn er dreginn var á land í sumar; hann var hjá uppstopparanum eins og sagt er á slæmri íslensku (hamskeri var víst einhvers staðar í æsku það heiti sem var opinbert ef Halur man rétt). Hann ólst upp við íslenkuáráttu og er ekki alveg laus við hana enn þann dag í dag. Urrrr-ið-inn er sem sagt kominn heim í Vinaminni og hefur farið á efri og neðri hæðina sem og útí garðinn þar sem haustlitir mæta fólki. Hann hefur ekki minnkað, þykkur og mikill. Halur vissi að erfitt yrði að ná gulu slikjunni en þetta er sem sagt ágætt; eins og sagt var í Íslandsklukkunni (sem sagt gott þar). Nú er hann kominn á ágætan stað ofan við gamla skrifborðið með rennihurðinni, þar sem allar veiði- og hnýtingagræjurnar eru í kjallaranum. Gott verður að líta á hann í vetur milli fjaðra á fingrum og þegar hjóli er brugðið úr skúffu. Halur segir sem sagt velkominn heim urrrriðinn minn.

Jafn

2007-09-23T22:13:00.000Z

heimskulegt og það nú er að segja sem svo að maður hefði nú ekki viljað missa af hinu eða þessu, eftir að hafa sjálfur verið þátttakandi eða álíka í hinu sama, þá er rétt að minnast á tónleika Megasar og Senuþjófanna í smábænum Akureyri um helgina. Megas er að mati ritarans einn af fáum "legendum Íslands", sem náð hafa slíku í lifandi lífi en ekki fyrir innantóm eftirmæli eða umsagnir hinna sem vita (eða vissu). Sjaldgæfur möguleiki sem m.a.s. Halur lét eigi framhjá sér fara. Megas er einn hinna sem Halur hefir áratugum saman haft ánægju af að hlusta á enda tónlist bæði ætluð til slökunar og æsingar, koma manni í rétta formið; Megas auðvitað allt í senn, enda í uppáhaldi með texta sína og laglínur er smjúga á milli og gleymast eigi. Mest kom þó á óvart atgervi kappans orðinn þetta "gamall" en andinn sýnist eiga nóg eftir eins og vonandi skrokkurinn; annað var og er ekki að sjá. Skapandi listaverk áratugum saman og það á landi eins og þessu þar sem mest og flest er klisja og allt nýtt best talið; innatóm verðmæti upphafin. Það er best að þakka fyrir sig og sérstaklega hinum ágæta vini er beindi Hali á tónleika Megasar í tíma. Það vissi á gott að sjá hálsklæði kappans á kamrinum rétt áður en tónleikarnir hófust, hangandi á snaga. Sjaldgæf sjón og upplifun, enda engin líkklæði þar.

Sjaldan

2007-09-17T10:00:00.000Z

er rétt að blanda sér í dómskerfið eða lögreglumál, en tækifærin eru óendanleg á Íslandi eins og annars staðar væntanlega. Að öllu siðferðishjali slepptu þá verður að minnast einu sinni enn (held að Halur hafi áður skrifað um sama mál en man ekkert) á "Hið stóra gjaldeyrisviðskiptatölvumálaðkveldidags" þar sem nokkrir saklausir norðanpiltar duttu oní gjaldeyrisbauk á heimasíðu Glitnis (sem halda mætti að væri í frjálsi falli) og færðu músina í nokkur skipti milli sölu og kaups. Síðan gerist það að hinn sami banki fær embættismannakerfið til að knésetja (og helst dæma seka) hina sömu fyrir "glæp" sem bankinn framkallaði. Og ætlar að halda þessu til streitu. Hvernig virkar kerfið og siðferðið; um það má deila eins og alltaf. Það styttist í skíðafæri.

Einstaka

2007-09-16T20:21:00.000Z

sinnum kemst Halur að því að hann getur lært og breyst. Slíkt mætti áreiðanlega oftar gerast. Eftir að hafa verið nokkuð harðsnúinn andstæðingur sjóbaða og eða baðstranda í útlöndum lærði hann loks í síðustu utanför að þar mætti dvelja og hafa það ágætt; sem sagt á ströndinni og við sjóinn (la mer). Skipti kannski máli að strandfélagar voru ágætir, synir tveir auk frúarinnar sem baðaði sig örlítið og var það eigi til skaða. Sjórinn temmilega kaldur og tær, fiskar að skoða og annað á landi. Síðan skipti kannski hið gullna lögmál milli seltunnar og líkamsþyngdar miklu enda Halur farinn að reskjast; hann átti þó nokkra góða spretti.

Sennilega

2007-08-30T18:49:00.000Z

er veiðitímabilinu lokið í bili hjá Hali og er minnisstæðast sökum þess að þetta er eða var fyrsta árið þar sem öllum "lifandi" fiski er á land kom var sleppt eða svo gott sem; tveir veiddir og gefnir veiðifélaga nýverið og einn tekinn til uppstoppunar. Það var gaman að koma við hjá Halla uppstoppara á Akureyri í dag, en ferð sú var farin fyrir algjöra tilviljun með taumefni sem nota skyldi við verkið. Viti menn, er Halur kom þar inn sem verkstæðið stendur, hélt sjálfur meistarinn á fiski sem Hali þótti helst til kunnugur. Var þetta þá sjálf 8,6 punda hrygnan er Halur dró á land neðst á "Hagatánni" fyrr í sumar og ákvað að gaman væri að ylja sér við á vetrarkvöldum ofan við hnýtingarborðið eða annars staðar innan Vinaminnis. Stutt, þykk og falleg en viss tregi í hjarta veiðimanns að drepa fiskinn sem reyndar var hálf-dauður er á land kom vegna slýs á taumi sem lagðist fyrir kjaft og kæfði nærri. Það hefði verið gegn lögmálinu að sleppa slíkum fiski. Því má við bæta að góður gestur kom við í Vinaminni nýverið og náði að létta aðeins á "koníaksbirgðum" Vinaminnis eftir að hafa verið við veiðar í Mývatnssveitinni nokkru áður. Halur hefur aldrei verið mikill koníaksmaður enda fyrst og fremst verið með slíkar veigar í geymslu fyrir gesti og gangandi. Einstaka sinnum stelst einhver í birgðirnar. En ánægjulegt var að sjá fiskinn á vinnslustiginu og tilhlökkun Hals talsverð að fá hann í hendur; óskin var að eiga einn fisk úr uppáhaldsánni og hann er kominn eða svo gott sem.

Breytingar

2007-08-23T13:11:00.000Z

ganga sums staðar hægt og annars staðar vart eða ekki. Þannig er það þegar unnið er í heilbrigðiskerfinu. Hali var bent á það fyrir skömmu að þar gæti kannski einhver dáið; það mundi kalla á breytingar. Kannski er það rétt. Svipað og í fótboltanum, einhver þarf að meiðast til að "næsti maður komist inn". Sennilega best að skreppa á skíði.

Græn

2007-08-16T21:36:00.000Z

litarafbrigði verða að teljast með hinum fegurstu í náttúrunni, fjölbreytt með afbrigðum að sumri til á Íslandi. Nokkur slík sá Halur í Fnjóskadal fyrir skömmu og auðvelt að hrífast, stöðva bílinn eða annað og horfa. Erfitt að ná ágætum ljósmyndum (nema bíða og bíða) og það var reyndar eigi gert (nema með auganu og minnisbanka innra). Við hin síbreytilegu birtuskilyrði sem á landinu eru, má mæla með því að taka afleggjarann til vinstri (malarvegur) rétt þegar ekið er austur yfir Fnjóskárbrúna við Vaglaskóg. Margir grænir litir bera brátt við augu og sem sagt rétt að bíða eftir réttu birtunni. Það er ennfremur talsverður búskapur þarna og á einu skiltinu við veginn stendur svo lesa má janvel fyrir litblinda (e-ð á þá leið): "Hestar ekki leyfðir". Svo mörg voru þau orð. Merkilegt að litblindur maður eins og Halur haldi upp á græna litinn með alla sína rauð-grænu litblindu.

Margt

2007-08-14T19:32:00.000Z

má læra af frændum eða nágrönnum hverjir sem þeir nú eru þrátt fyrir allt; margt heldur margur halur sig kunna. Altalað er hversu mikil mengun er víða í Rússlandi hinu forna, slíkt stendur í blöðum og sumt af því er sannarlega rétt, það hefir Halur sjálfur séð í ferðum austur þangað, þ.e.a.s. á Kólaskagann. Hitt má og skal einnig fram koma að sóðaskapur er víða mikill hér á landi "tærleikans". Skítur það skökku við að sjá sígarettustubba víða ásamt bjórdósum við margar ár á Íslandi sem og gönguleiðir, bílastæði, sums staðar betra en annars staðar eins og alltaf. Það kom því skemmtilega á óvart í síðustu ferðinni á Kóla að sjá hversu þrifnir Rússarnir voru, feðgarnir þrír; nóg reyktu þeir synirnir og alls staðar en gerðu hins vegar hitt að safna stubbum í lítil vindlabox, dömuvindlabox. Tóku stubbana með sér en skildu eigi eftir. Þetta mættu margir sér til fyrirmyndar taka. Fyrir utan gömul skriðdrekaspor voru engin merki um eitt né neitt sem minnti á mengun eða ferðir manna. Þetta voru svona fréttir af manni sem er þekktastur fyrir að kenna öðrum en hvað gerir hann sjálfur!? Dauðablogg.

Ævintýrin

2007-08-09T12:23:00.000Z

eru oft nærri en maður heldur. Lengi hafði Halur haft hug á því að ganga að eða nálægt Hraunsvatni í Öxnadal, og þá frá Hrauni enda talsverður andlegur skyldleiki við Jónas Hallgrímsson (nú mega allir brosa). Svo fór að húsfreyjan rak Hal af stað einn góðviðrisdag um hina hörmulega ömurlegu verslunarmannahelgi (sama hvort maður telji sig með eða á móti 18 ára aldurshópi) og sem sagt frá Hrauni. Leið þessi verður að flokkast með þeim fegurstu og skemmtilegustu sem Halur hefir skroppið á tveimur mis-jafnfljótum og það ekki lengri en 2,6 km. Nálægðin við skáldið og náttúrufræðinginn greinileg (ímyndun Hals!) og sérlega er Hraundrangi stóð næstur en hann var látinn bíða sökum tímaleysis. Mikilvægt að komast eða fara sem næst honum. "Þar sem háir hólar......" eru og ekki oft sem Halur gengur á ljóðum eða kveðskap. Þeir munu hafa myndast þegar fjallið fyrir ofan Hraun féll fram þannig að eftir stóðu Hraundrangarnir. Þetta var tóm dýrð og endaði síðan í matardýrð að Hálsi á Halastjörnunni þar sem stúlkur reiddu fram ágætis kvöldverð og vatn drukkið með. Leiðin sú frá vatni að Hálsi er ekki nema hálfdrættingur á við hina efri frá Hrauni. Það er áreiðanlegt svar. Þarna er ágætt að nota göngustafi sökum hallans og mismunandi jarðvegs.

Ævintýri á gönguför.

Haldið var

2007-07-30T15:55:00.000Z

í skottúr suður yfir heiðar til að feira 10x5 ára afmæli bróður í Grafarvogi; allir skemmtu sér ágætlega sýndist Hali og meira að segja rigndi í borginni, veðrið var eins og það var einu sinni (venjulega). Það má kalla það annars konar skyndibita, þ.e. þegar eknir eru tæpir 800 km á 35 klst. tímabili, komið við í afmæli og biti settur á disk, það er annars konar skyndibiti sem og ekkert á skylt við hinn venjulega. Skyndilega fékk maður mat í gogginn, því skyndibiti. Síðan var skundað af stað, þó ekki alveg í skyndi.

Verðskyn

2007-07-30T14:06:00.000Z

ritarans er og eða var nærri ekkert; því breytti um stundarsakir pöntun "skyndibita" í höfuðstað Norðurlands með stóru enni en ekki öðru. Nú er búið að koma verðskyninu á hreint. Pöntun frá "take away" stað innan bæjarmarka setti eiginlega staðalinn á annað plan, en allmargir innanbúðarstaðir hafa þó keppt um verðlaun áður. Reglurnar tvær. Fyrsta regla er að panta aldrei skyndibita. Regla tvö er að panta aðeins skyndibita ef ekkert finnst ætt í nágrenninu og allir eru tilbúnir að verða fyrir áfalli. Hvernig er síðan unnt að greiða (ef rétt er munað) 6000 kr. eða álíka fyrir herlegheitin, tvo rétti með hvítum, þurrum og ofsoðnum grjónum, gömlu brauði í álpappír og brauðstangir (sem voru reyndar ætar) er jú önnur saga. Verðskyn ritarans nær einnig stöku sinnum að vakna þegar pantað er gos eða gosdrykkur á búllu eða restauranti innanbæjar eða utan; sama gildir um flestan mat. Einnig þegar tilboð á hálfum lítra af gosdrykk á bensínstöð kostar 199 kr. (sem sagt á tilboði). Auðvitað eru þetta allt hlutir sem allir geta verið án, en segja ótal margt um hvað Íslendingar láta bjóða sér og þá Halur sömuleiðis ef því er að skipta. Best að þakka fyrir það að víða er mögulegt að kasta vatni ókeypis á Íslandi, sem sagt míga.

Styttist

2007-07-08T20:33:00.000Z

í margt núna; veigamest er þó veiðin. Einnig afmæli framundan hjá bræðrum. Allt er til reiðu til að taka á móti fjórum veiðimönnum að sunnan, sumir sterkari (og þyngri) en aðrir og hvíta svínið fer með á tuddanum ef allt fer sem horfir. Enginn er farinn af stað. Í kvöld var það svín í matinn og nokkrar pulsur fyrir drengi. Allt klárað, einfalt. Þetta verður vonandi þægilegur túr og nægur tími til að fúndera á bakkanum. Spurning hversu mörg flugubox fljóta með og súkkulaði sem náðist ekki að klára í Rússíá.

возвращено

2007-07-04T20:49:00.000Z

ot myxa рыболовство b Россия. Sannarlega gaman að koma heim úr slíkri ferð sem sennilega verður öllum þeim er þátt tóku með öllu ógleymanleg. Það er ekki nokkur ástæða til að nefna eitt framar öðru enda með leiðinlegasta móti að heyra þá er veiðar stunda segja frá. Það er unnt að dást af hinu stóra ríki austur á Kólaskaga, þar taka margir með sér sígarettustubbana í vindlaboxi en kasta ekki á jörðu. Skynsamir voru þeir að fá ráð sér vitrari manna með fyrirkomulag veiði, þ.e. veiða og sleppa, annað en landinn sem loks er búinn eða á leiðinni með að tæma flesta staði í ám þar sem fleiri en tveir fiskar koma saman. Síðan er Anna frænka með Sigurd í heimsókn og bíður uppá kost og annað alla daga þannig að þetta er hrein sæla sem engan enda tekur, endalaus gleði, ekki hvað síst eftir marga veiðidaga, vesturför og enn meiri veiði í vændum, veiðitúrar sem sagt. Og farinn að hugsa til næstu ferðar eitthvað útí bláinn. Loks þarf að hrista tuddann á vegum úti og gefa trukkakaffi.

Varahlutir

2007-06-10T13:54:00.000Z

óskast! Oft og einatt má lesa slíkt eða lesa mátti á árum áður. Sumar árgerðir standa sig betur en aðrar, sumar eldast fyrr og ryðga. Svipað er með manninn, homo erectus, "homo Öndólfsstaðaiensis" sem mun víst eiga nokkuð sem afmælisdag má með réttu nefna. Hann er þó með alla gömlu hlutina á sínum stað, þarfnast engra viðgerða eða breytinga sem aðrir sjá nema ef væri "einkaþjálfari" hans og boðflenna í tilefni dagsins. Þótt boddíið breytist aðeins (eða nærri ekkert milli ára), þá er innihaldið ósvikið. Til hamingju með daginn nágranni og vinur.

Síðasta

2007-05-27T12:17:00.000Z

krotið á síðu þessa í bili (og kannski alveg, ekki hótun!) tengist starfsheitum fólks; hversu mikils virði þau eru hverjum og einum. Halur sá andlátsfregn um gamlan mann sem var titlaður bréfberi. Koma þá í hugann breytingar þær sem orðið hafa á þjóðfélaginu síðustu áratugina eða 100 árin skulum vér segja. Algengara verður að dæma og fjalla um fólk eftir eignum og fjárhagstengdu hátterni eða möguleikum, en eigi getu eða viðhorfi; Halur mun halda áfram að reyna að bæta sig með því að breyta rétt og hugsa öðruvísi þegar það á við. Verður það að teljast fullt starf fyrir hann eins og hjá bréfberanum forðum að koma bréfum og pósti, bæja, húsa, sveita á milli.

Kona ein

2007-05-25T11:16:00.000Z

sem gift er náfrænda Hals á nokkuð sem hún segir vera ástarhreiður og margar konur öfundi hana af. Sú hin sama hefur skipt um nærbuxur í eldhúsi í Reykjavík hjá frænda eiginmannsins. Nærbuxurnur fóru víst ekki í uppþvottavélina. Þetta var fyrir hádegið. Halur spyr því hvort rétt geti talist fyrir hann að koma sér upp ástarhreiðri eða annesíu á lóðinni? Hverju gæti það skilað? Þeir eða þær sem koma í Vinaminni mega hvenær sem er skipta um nærbuxur, auðvelt er að fara í búrið ef menn vilja vera út af fyrir sig en það skiptir væntanlega fáa máli. Svo eru einhverjir oftast nærbuxnalausir.

Eitt athyglisverðasta

2007-05-24T12:10:00.000Z

málið sem fyrir augu Hals hefur borið undanfarið er hið s.k. "gjaldeyriskaupa- og sölumál bræðra á Akureyri hjá Glitni". Öðruvísi mér áður brá. Dómgreind, dómgreindarleysi, siðvitund, ásetningur, hagnaður, lögbrot, siðlaust, löglegt, ólöglegt, allt í lagi, eðlilegt, óeðlilegt. Fleira kemur upp í hugann, en sleppum því. Mál þetta er eða verður að teljast einn besti mælikvarðinn sem lengi hefur skotið upp kollinum varðandi siðferði banka og það frá mörgum hliðum. Í fyrstu má spyrja hvers vegna bankinn fór ekki strax í upphafi fram á það að ná sátt í málinu. Hverjir hafa hagnast á viðskiptum við banka á Íslandi af þeim sem kalla má "almenningur"? Það verður áhugavert að sjá hvernig málarekstur þessi endar, endar með ósköpum sjálfsagt. Halur sá ágætt innskot um efnið á bloggsíðu sem var þannig: "Hvaða munur er á að stofna banka og ræna banka?" Þetta mun Makki hnífur hafa sagt í Túskildingsóperunni eftir B. Brecht.

Ekki

2007-05-22T19:23:00.000Z

mátti Halur við því að uppgötva fleiri hættur í umferðinni en þegar eru, en því miður hefur hann í nokkur skipti sannreynt hættuna sem er afar varasöm. Hættan sem um ræðir tengist fólki er gengur eða hjólar um götur bæjarins með hlustpíputól, hljómtól í eyrunum, gengur eða hjólar sem sagt, heyrir ekki flaut né köll, jafnvel þótt stórir trukkar aki nærri, ganga þvert á umferðavenjur og hvar sem er yfir götur og annað, gá ekki að sér, lifa í eigin hljómheimi, sem er auðvitað ágætt nema nærri umferðinni. Halur hefur bæði lent í þessu á hjóli og akandi ensku landbúnaðarfarartæki, sem þrátt fyrir að vera lipurt á allan hátt og veitir góða yfirsýn, með svolítinn hljómgrunn í umhverfið, varð t.d. nokkuð tæpur fyrripartinn er ung blómarós gekk á ská fyrir farartækið og leit sí svona við eða til baka á Hal þegar yfir götuna var komið; það vildi svo vel til að Halur er hægfara maður í bifreiðinni, gat hemlað í öðru veldi og varð það stúlkunni til happs. Landbúnaðartækið hefði eigi hlíft stúlkunni ef á hefði lent. Það er hins vegar ótrúlegt en auðvelt að skilja hversu margir ganga með hljóm í eyrum alla daga, það sést vel í púlstöðinni við sjóinn. Þögnin verður æ eftirsóttari.

Undarlegt

2007-05-20T13:13:00.000Z

að sjá hvernig heilu byggðarlögin eru að falla í sjó fram fyrir vestan, ekki af völdum náttúruhamfara heldur eru orsakir aðrar og öllum kunnar. Skrítið að sjá Flateyri verða næsta á dagskrá, en þar vann Halur þegar hann var ungur, myrkra á milli, þar var næga vinnu og fisk að hafa alla daga eins og víða fyrir vestan. Útlendingar voru byrjaðir að vinna á þessum árum í sjávarþorpum, pólskir og ástralskir á sínum tíma og einnig frá öðrum löndum, nær og fjær. Út af fyrir sig má það teljast allnokkuð kraftaverk að Flateyringar skuli hafa haldið út svo lengi eftir síðustu náttúruhamfarir. Þeir ráða þó ekki við lýðræðisríkið Ísland og stjórnun fiskveiða sem sett var á laggirnar á þeim tíma er menn gáðu ekki að sér, nema örfáir sem "vissu út á hvað þetta gekk". Sennilega stærsta mannréttindabrot á landi hér eftir 1262.

Sumt

2007-05-19T13:16:00.000Z

er alltaf jafn skemmtilegt að gera, sumt er ókeypis en annað eigi. Sumt er rétt að spara til að finnast það jafn gott eða ágætt lengi vel, eitt svoleiðis má nefna óhikað, en það er Brynjuís. Hann er reyndar ekki allra frekar en annað og einn ókostur (kannski kostur) er sá að hann er "aldrei eins", misharður eða -mjúkur, sumir vilja mjúkan, aðrir ekki, bragðið aðeins breytilegt og vélarnar gefa sína útgáfuna hver af ísnum. Hitt er þó öruggt að Brynjuís gleður alla sem hann vilja; það er alltaf gaman að fá sér Brynju.

Sjónin

2007-05-16T13:55:00.000Z

og minnið hafa látið á sjá með árunum, hvað þá litasjón. Halur sér enn mun á gráu og svörtu hélt hann, en var í vafa þegar erindi átti í nýja hverfið á Eyrarlandsholti, Naustahverfi mun það heita. Þar bar fyrir augu nýbyggður "Berlínarmúr" í miðju hverfi, nánast eins og skjöldur eða þil til að sitja undir ef veður væru válynd fyrir alla íbúa bæjarins. Mörg ný hús á Akureyri eru verri hvað hönnun varðar en allt annað sem Halur hefir séð, Breiðholtið með talið. Skipulag slíkra hverfa með þess háttar byggingu má telja með ólíkindum og kemur vart neinum til góða nema verktökum. Halur hélt að hann vissi muninn á gráu og svörtu, en þetta mun sannarlega vera að bæta gráu............

Hann fagnar hins vegar lýðræðisreglum Ríkisins, en nefnir ekki pólitík, enda lofað því margsinnis áður. Hann veit um yfirmenn hjá "Bænum" sem fylgjast með hverri hugsun og hverju fótmáli.

Magn

2007-05-09T19:54:00.000Z

og gæði fara ekki alltaf saman en sambandið þar á milli er flókið. Lokaorðin í pólítíkinni er saga sú er Halur heyrði af frambjóðendum f. austan í öðru fjölmennasta plássinu þar nýverið. Boðað hafði verið til fundar um málaflokk þann sem mest tekur til sín af öllum hvað fjármagn snertir; áhuginn var bara all nokkur eða fimm -5- manns sem mættu og þar voru með taldir tveir er "þurftu" að mæta. Sem sagt lýðræðið er í sókn.

Lýðræðið

2007-05-09T15:23:00.000Z

birtist Hali í ýmsum myndum; eitt farganið eru skoðanakannanir. Þær hafa riðið húsum í heilbrigðisgeiranum árum saman eins og víða annars staðar, sleppum ekki blessuðum stjórnmálunum. Enginn árangur eða bati komið í kjölfarið innan heilsugeirans; þeir einu sem "græða" eru IMG og geldingar með töflureikna og línurit. Halur styður frelsið en í t.d. pólitíkinni er þetta svipað orðið og í fótboltanum, ekkert kemur lengur á óvart. Kannski segir þetta mörgum hversu litlu máli kosningar yfir höfuð skipta; Halur telur mikilvægara að fyrirtækin blómstri án afskipta ríkisins, það tryggir fleirum lífsgæði en flest annað, betur en kosningar enda spillir "valdið".

Veit

2007-05-08T09:55:00.000Z

hinn eini lesandi bloggsins hvað orðið "kúskerpi" mun þýða, er reyndar bæjarnafn í Blönduhlíð?! Eða voru þeir þrír að tölu? Halur þykist vita merkinguna en spyr samt eins og sjá má enda styttist til kosninga þar sem allir sigra eins og í júróv., það er til einskis að deila um smekk. Það voru hins vegar mun fleiri helsingjar í Skagafirði en áður á sama tíma, flokkar með tugum og hundruðum fugla. Glæsilegur fugl. Kannski stendur útkoma gamla bændaflokksins og fellur með fjölda helsingja í Skagafirði, en ekki er vitað hvort um er að ræða beint eða óbeint samband þar á milli og einnig gæti talning milli dag verið breytileg eftir svæðum.

Pönnur

2007-05-06T19:27:00.000Z

eru víst einnig seldar í Pottum og prikum, lítilli verslun á Eyrinni innan bæjarmarka Akureyrar. Hali áskotnaðist ný steikarpanna frá "de Buyer" og þegar reynt hana tvisvar við mismunandi matargerð. Því er unnt að segja strax; pannan lofar afar góðu, mun jafnari hiti en áður hefur verið á pönnum Vinaminnis, flestar hafa viljað hitna misjafnlega mikið, meira í norðaustur horninu þegar staðið er við eldamennskuna og horft í norður. Eigi vitað hvers vegna. Halur hefir reyndar í seinni tíð (að nýju) hrifist af fleiru og fleiru sem franskt er. Fyrirtækið framleiðir ógrynni af pönnum, í öllum stærðum og gerðum, en nú hljómar þetta eins og auglýsing, sem reyndar vart var ætlunin.

Afrek

2007-05-06T16:20:00.000Z

eru ýmis konar. Eitt afrek vill Halur nefna en það er hið glæsilega og ánægjulega afrek að hafa staðið við það og komist hjá að hlusta á, heyra, eða sjá einn einasta frambjóðanda (halda ræðu) til komandi þingkosninga. Lýðræðið er nærri dautt. Annað ánægjulegt er Halur komst að í dag má nefna; hann er kominn í "elítuflokk" miðað við aldur hvað varðar þjálfun. Auðvitað trúir hvorki hann né nokkur annar þessu en samt, nokkuð til íhugunar. Svona innskot á tímum þegar allir eru að hlaupa og æfa út um allt og nálgast takmarkið, takmarkið um að bæta sig aðeins milli missera.

Frelsi

2007-05-01T11:59:00.000Z

er eða hefir ætíð verið Hali hjarta næst. Vonandi gefur 1ti maí starfsfólki a.m.k. meira frelsi og í leiðinni frekari ákvörðunarrrétt í fyrirtæki því (þeim) er það starfar hjá; samtímis þyrfti sá hinn sami að eignast hlut í fyrirtækinu. Þannig væri komin tryggari leið og "allir hagnast". Þessa leið þarf að innleiða víða. Enginn er sammála þessu eða alltof fáir. Hvers vegna svona skrif og kjaftæði? Jú, vegna þess að Halur hefur verið að líta á Kólaskagann á netinu, notast við ókeypis forrit sem allir þekkja, verið að góna á gróðurinn og hæðirnar eystra þar nærri Poni via Goggle Earth sem er til komið ef satt er út úr gæluverkefnum starfsmanna Google. Starfsmenn þar munu örugglega þurfa að "afkasta miklu" en ef þú ræður þér að nokkru eða miklu í vinnunni, þótt þú starfir með eða hjá öðrum, þá er það allt önnur saga. Ef satt er, þá mega starfsmenn þessa fyrirtækis nota um fimmtung starfstímans fyrir "gæluverkefni" alveg eins og hjá íslenska ríkinu eða hvað? Alveg eins og kaupin á Grímseyjarferjunni hjá ríkinu hinu íslenska; þeir eru bara nokkuð sniðugir eða þannig þessir sem vinna í ráðuneytunum og deila aurum, mínum og þínum aurum; minnir á kjarabaráttuna.

Bjartsýni

2007-04-30T14:00:00.000Z

er öllum nauðsynleg og ekki hvað síst með aldrinum; og þó þar sem æskan er ekki alltaf eins og breiðgata. Halur öðlaðist bjartsýni er hann las um pillu sem verið er að þróa fyrir konur og gera skal tvennt, sem sagt auka kynhvöt kvenna og draga úr matarlyst. Öðruvísi mér áður brá. Það er aðeins einn hængur á þessu eða tveir; pillan kemur ekki á markað fyrr en eftir áratug (eða of seint) og karlar þyrftu pillu sem drægi úr kynhvöt og minnkað gæti átlöngun eða hvað?

Eftir að hafa

2007-04-26T20:40:00.000Z

setið yfir framboðslista Flokks H. Húfubólgusonar fyrir kosningar á næstunni, verður Halur því miður, að tilkynna hin leiðu tíðindi, að flokkur hans er hættur við að taka þátt í kosningunum. Fyrir það fyrsta getur Halur ekki farið fram nema í 13da sæti en það er ekki öruggt sæti (í dag); í annan stað og svo framvegis má nefna hættu á klofningi, 7 flokka stjórn, minnist kosninganna 1959 eða 1974, aftur klofningur, flutning atkvæða milli flokka þannig að einn flokkur fær fleiri atkvæði en annar, vondir stólar, lág laun nema hvað, loforðagleymsku, fælni við framkomu, lágur prófíll, ófagur, bakhjarlaleysi. Farinn.

Gömul kynni

2007-04-22T19:12:00.000Z

gleymast ei; það sannaðist í skemmtilegum tónlistarþætti í útvarpinu í gær um grúppurnar en ekki grúpp-píurnar sem voru í tengslum við Rokkbyltinguna í Reykjavík á sínum tíma. Halur átti einu sinni 2ja eða 4ra laga vínýlplötu með hljómsveitinni Þey; fallbeygist svona með og án greinis:
þeyr
þey
þey
þeys

þeyrinn
þeyinn
þeynum
þeysins

Tedrukkinn, Maggasýn, Rúdólf og fleiri gullkorn; ekki verra þegar vinur í götu átti þetta við hendina og færði Hali að láni. Það er enginn leið út úr þessu rassgati sungu þeir og sagan endurtekur sig; rassgatið kemur einnig við sögu hjá Hugleiki Dagssyni sem er einungis stórsnjall teiknari og skrifari og bestu verkin þegar orðin "sígild". Gott að halda þannig sögum eða myndum að börnum (baulaðu nú Búkolla mín).

Sumargjafir

2007-04-22T11:35:00.000Z

eru sennilega gáfulegri en flestar aðrar gjafir (flestar óþarfar, en sælla er að gefa en þiggja). Sumarið og birtan er á sinn einstaka hátt öðruvísi og best að sofa árstíðina eigi af eða frá sér. Sumarið er gjöf náttúrunnar. Unnt er að færa sjálfum sér gjafir, t.d. að fara í sund og stundum er það ansi gott þeim er sjaldan þangað fer. Af vatni og jafnvel hreinu eða tæru er ofgnótt enn á landi hér, en þannig er óvíða farið. Halur hefir verið að gjóa augunum af og til austur til Mongólíu en þar er málum öðruvísi háttað. Hann gladdist er fréttist af verðlaunum (gjöf) til handa Tsetsegee Munkhbayar. Halur stefnir á ferð austur til Mongólíu innan fáeinna missera eða ára í versta falli. Þar ku vinsemd fólks vera mikil sagði fransmaður Hali á Kólaskaga í fyrrahaust. Ef Íslendingar væru aðeins fleiri, hvað þá með öll vatnsbólin, árnar, vötnin, jarðhitann, sundlaugar og annað sem krefst vatns?

Blindsker

2007-04-07T22:57:00.000Z

þjóðernishyggju, þjóðernis; farið á leiksýningu þar sem íslenskir Derrickar voru ekki að leika eins og ætíð á árum áður. Sýning er samanstóð eftir því sem Halur veit best af útlendum aktörum, öllum ágætum, gamall skólabróðir ritarans samdi textann, margir leyndir brandarar. Það byrjaði þó þannig eða leit út fyrir að vera sóló-sýning fyrir Hal og drengi tvo eru fylgdu honum á svalirnar; annar aldregi komið þarna áður, en síðan komu 4-5 aðrir eða svo og sátu sýninguna út. Halur hefur á stundum verið kominn að því að ganga út í miðri sýningu. Salur þéttsetinn. Halur veltir því stundum fyrir sér hvers vegna það telst vera allt í besta lagi fyrir Íslendinga að "þiggja góðsemi" erlendis í námi og fleiru, horfa á kvikmyndir útlendar, sem tröllríða öllu hér á landi, fá allt lánað eða keypt sem þeim hentar en henda hinu á haugana; hitt þetta sem eru útlendingar búsettir á Íslandi. "En passant" má nefna (eða ekki) að Halur kom við á Hóteli KEA í kvöld og sótti þar tvo poka af kaffi sem komust ekki með flutningabílum norður f. páska en sölumaðurinn dó ekki ráðalaus; sendi pokana með frænku norður og hringdi í Hal. Má Halur drekka kaffi sem ættað er frá útlöndum og nota ítalskar aðferðir við að brugga kaffið í bolla? Íslenska kaffið (hvar er það ræktað?) hlítur að vera "best í heimi" eins og reyndar ofangreind sýning hét.

La Marche de l'empereur

2007-04-07T12:16:00.000Z

stóð til að taka upp á mynddisk í gærkveldi og þá sá Halur ljós; Guð minn góður, Jesús Kristur er orðinn "auglýsing" á Ríkistívíinu. Jesús, um Jesúm eða Jesú, frá Jesú og til Jesú! Ekki flókið. Held að föstudagurinn langi hafi verið í gær (allir dagar eins) og öðruvísi mér áður brá eða fylgist Halur illa með veröldinni? Halur styður þó frelsið, allt er leyfilegt en burt með auglýsingarnar og þá alltaf á ríkisrekinni stöð. Það er unnt að mæla með lestri Gunnars Stefánssonar á Passíusálmum HP, hlusta stundum á hann á vefnum eins og núna. Hali líkar lesturinn, textinn í raun sígildur og góður.

Halur telur sig hafa séð líkingu Krists á krossinum í göngugötunni á Akureyri f. mörgum árum; Anna R. að sópa stéttina og skúra, var með prik og hékk á því, sveiflaði og var í grænu bikiníi í norðanáttinni. Sennilega eina lífsmarkið í göngugötunni frá því að Halur flutti norður, en margir munu hafa "krossfest" atriði þetta, kallað lágkúru. Franska fyrirsögnin minnir Hal á ólund sumra í garð Frakka og er til að árétta þol í garð annarra (líking við mörgæsirnar!); sennilega sökum sérvisku Frakka og hversu hreiknir þeir eru af öllu sem franskt er!

Í dag vissi Halur

2007-04-01T19:30:00.000Z

hvorki né; hvort hann væri að kveikja eða slökkva á perunni. Hann hefir misserum saman verið að reyna að koma ljósi til að loga í anddyrinu, annað perustæðið verið bilað. Síðan kom draugur í baðljósin við spegilinn; aðeins annað lýsti og þá aðeins annað með sömu perunni. Frúin bar í hann þrjár en ekki þrettán ljósaperur nýverið en það varð eigi ljós. Tveir karlar börðu að dyrum Vinaminnis síðdegis; annar rafmaður, hinn perumaður enda spilaði hann með Perunni á sínum tíma. Frægur en fáir þekkja í dag. Fór svo að í ljós kom (ekki ljós samt hjá Hali) að allar perur sem keyptar höfðu verið reyndust ónýtar, nema þessi eina sem alltaf lýsti á baðinu, hægra eða vinstra megin, sunnan eða norðan; marg-gáð að slíku áður og teknar úr nýjum umbúðum, samt svona. Ekki batnaði það þegar ljósið var reynt í anddyrinu; þar var nægilegt að rafmaðurinn skrúfaði peruna einu sinni í stæðið og þá varð ljós.

Heimskur er heima hver, Halur er heima hver.

Hjarðeðli

2007-03-28T10:08:00.000Z

mannsins er merkilegt fyrirbæri en einnig má misskilja það sem allt yfir höfuð. Það kemur víða fram; karlar hópast saman við veiðar, fara á velli og konur í klúbba, karlar einnig og konur svolítið að safnast saman nærri veiðistöðum, lítið enn sem komið er, mest einhverjir krampar, ekki skeiðarkrampar. Karlar kannski með pungkrampa. Síðan þurfa allir að upplifa eitthvað sem "enginn má missa af", "einstakt tækifæri", "kemur ekki aftur", en slíkir viðburðir eða tækifæri, tilboð eru daglegt brauð eins og það eiga 33 ára afmæli á eftir 32 ára afmælinu. Konur á Akureyri sýndu hjarðeðli í gærkvöldi, þær greip hjarðeðli, en þá var álíka atburður með framhaldi næstu daga; öfund í Hali, nei. Hjarðeðli Íslendinga í fjárfestingum, bílakaupum, raðgreiðslum og lánum er sérstakt, en eitthvað gerir það að verkum að alltof margir fara og taka "lán" uppá 5 millur, borga 100 kall út og greiða alls 8 millur á 6-8 árum og eru segja þeir að græða, hjörðin gerir þetta, hjarðeðlið.

Sjö undur

2007-03-23T19:52:00.000Z

veraldar komu Hali til hugar er hann heyrði sögu sjómanns nýverið; sjómaðurinn sem er kominn á níræðisaldur og vel ern, en stirður af gigt, kastaði því fram í kjölfar þess að hann vissi að flest mætti lækna með hnífi (!), að hnífar hefðu verið hin mesta gersemi áður fyrr á sjó og eru eða væru væntanlega enn. Hann minntist þess að stundum hefðu menn verið að njósna um hnífa náungans, bera saman bit, stærð og hagleik. Eitt sinn varð honum litið undir koddann hjá skipsfélaga sínum og sá þar hvorki fleiri né færri en sjö hnífa eins og undrin sjö, en Sjö Samúræjar komu strax upp í huga Hals. Góðir hnífar eru vissulega afar ánægjulegir hlutir að bera og hvað þá nota. Hali áskotnaðist einn úrvalshnífur í vikunni, ótengdur sögunni, færður af freyju sinni; hnífur með japönsku lagi, Santoku 7" hnífur sem hefur lag við hæfi, fellur vel í hendi, vinnulega séð unaður að nota við fyrstu kynni og útlit óaðfinnanlegt, stálið þýskt, framleitt af einum rótgrónum GmbH & Co allt frá 1778!

Skín

2007-03-19T13:46:00.000Z

eins og sagt var hjá Matta Jokk: "Skín við sólu Skagafjörður skrauti búinn, fagurgjörður." Þannig er nú fyrsta línan í þjóðsöng Skagfirðinga eftir skáldjöfurinn, sem ólesinn er að miklu leyti hjá Hali; því væri gott úr að bæta. Óðurinn er 13 vers. Þrettán. Línur þessar veita enga vissu um framtíðina. Hún er sem ætíð í algjörri óvissu. Skaplegt varla taldist ferðaveður norðanlands í gær, en er Halur reis máttfarinn úr rekkju skein sól að nokkru. Haldið vestur. Margir á ferð, enda mánudagur og e-r eftirlegukindur frá gærdeginum. Ökutæki misjöfn eins og mörg. Sumir með einkanúmer eða hvað sem það er kallað en aðrir venjulegir. Sumir á Skóda, aðrir á Pæjeró, enn aðrir á Fólksvagen. Er Halur var kominn nokkuð norðan Varmahlíðar mætti honum Skóda bifreið líklegast, hvít á lit (einn af fáum litum er Halur þekkir, en hann þekkir aðeins einn hvítan lit). Þá kvað Halur:

Varla hélt að eldri yrði
ellegar keyra Halur þyrði,
þegar sá
þeysa hjá
"sjálfan Elvis í Skagafirði".

Elvis er sem sagt á Skóda í Skagafirði, á númeraplötunni stóð reyndar (ef rétt var tekið eftir): ELVISP! Elvis norðursins, Elvis Skagafjarðar, aumingja Elvisarnir í Ameríku.

Hvassviðri úr görn

2006-06-14T10:36:00.000Z

er ekki alltaf vinsælt. Í gær var talsverður vindur úr görn leystur í Vinaminni og það jafnvel á ólíklegustu stöðum af "vindefnaminni" persónum. Kannski hefur það bara verið æfing fyrir daginn sem er að byrja, en von er á tveimur veiðimönnum norður, sem báðir geta losað talsvert ef því er að skipta. Hvassviðrið úti í morgunsárið var töluvert, en vindurinn er jú versti óvinur reiðskjótans eins og áður hefir áreiðanlega fram komið á þessari vindlausu síðu. Það eru orðin nokkuð mörg árin síðan Halur stundaði vindlosandi æfingar í Haga, en það þótti nú talsverður heiður í þá daga. Halur kvað:

Víst við máttum þenja þind
þegar leysa skyldum vind,
en öfugt við
hinn evangelíska sið,
það enginn taldi synd.

Hvassviðri

2006-06-12T13:43:00.000Z

mun hafa verið í Mývatnssveitinni í gærdag, það sagði Hali kona í dag sem var með tjaldvagn; aðstoð þurfti hún og maður hennar við lokun vagnsins! Fiskur mun í ánni þótt vart geti hann orðið meiri eða betri en í fyrra, sem var afbragðsár. Skiptir síður máli en fyrrum, aðalmálið að komast austur, fyrst í "dalinn" sem batnar eftir því sem ofar dregur. Biðin loks á enda eins og stundum er með iðnaðarmennina. Halur heyrði af einum sem búinn var að bíða nokkuð lengi eftir slíkum; sá bíðandi spurði Hal hvort hann vissi muninn á iðnaðarmanni og dauðanum, en það vissi Halur eigi fremur en annað. Maðurinn svaraði um hæl með þessu: "Dauðinn kemur (alltaf að lokum) en iðnaðarmaðurinn eigi!" Aukalega má nefna að "Rauða perlan" var seld um helgina af umboðsmanni sínum til UMF Arsenal. Allir sáttir.

Snyrtimennska

2006-06-05T11:02:00.000Z

er Akureyringum í blóð borin. Er Halur kom að gámasvæði bæjarins, sem kannski er í fáeinna mínútna fjarlægð frá flestum stöðum innanbæjar, þá var lokað eins og sjá mátti á hliðinu. Við hliðið var hins vegar (eins og oftast) haugur af alls kyns drasli sem einhverjir höfðu skilið eftir þarna, sem sagt komið að lokuðu hliði..............eigi skaltu gjöra öðrum það osv. Hvað finnst fólki um það ef nágrannar losuðu kerrur og pappa á næstu lóð? Þessi losun segir afar margt um þjóð þá er landið byggir og þeim sem finnst það í lagi að losa rusl framan við haugasvæðið þegar það er lokað, þeim hinum sömu ætti að standa á sama um það þótt landið verði vinnuvélum að bráð. Annars er þetta allt í lagi, Halur ók bara til baka beina leið með ruslið og sætir færis er hliðið opnar næst. Þetta minnir hann einnig á manninn, sem hringdi í hann af flugvellinum í Reykjavík nýverið, en hann var að tilkynna Hali um ferð sína norður til að taka við vaktinni á hælinu. Sá böggull fylgdi þó skammrifi, að sá hinn sami ágæti maður átti, þegar á flugvöllinn var komið, pantað flug milli Akureyrar og Reykjavíkur en ekki öfugt. Það skiptir því máli að fara rétta leið! Aldrei þessu vant var það ættingi þessa ágæta manns sem pantaði flugið, en eigi hann sjálfur.

Ókeypis dægrastytting

2006-05-27T17:50:00.000Z

eða áhugamál eru af ýmsu tagi, en fæst eru kannski ókeypis þrátt fyrir allt. Það er vissulega ætíð unnt að eyða einhverjum skildingum í áhugamálin, en t.d. það að skoða fugla er í eðli sínu ókeypis, einnig að ganga úti við; sleppum því að ræða um skóna eða sjónauka og annað álíka sem má þá nota í annað en áhugamálið. Aftur er farinn að heyrast fuglasöngur nærri Vinaminni og Halur hefur litið eftir fuglum við sjávarsíðuna og í fjöruborðinu, við leirur og ósa. Þar er gott líf í vaðfuglum sem nokkrir heimsækja Ísland árlega; í sérstöku uppáhaldi er jaðrakaninn, en hann er einn fegurstur fugla er heimsækja landið, fegurri en stóriðjufuglarnir. Það þarf að hafa talsvert fyrir því að vera fugl á Íslandi þetta vorið. Jaðrakaninn sýndi Hali þann heiður að sýna sig í fjöruborðinu eða réttari sagt við leirur og fyrir það vill Halur þakka. Jafnvel spóinn var í heimsókn á Vinaminnishólnum í dag.

Legnám

2006-05-23T12:53:00.000Z

ætti vart heima á síðu sem þessari, fullri af e-s konar karlfýlu og álíka. Hins vegar er það nú svo að Halur veltir því fyrir sér (!) hvernig standi á því að á Íslandi fari 4ða hvert leg í formalín og aðallega sökum góðkynja "sjúkdóms" ef tölur eru réttar, en svona er þetta víða, sums staðar skárra og annars staðar verra. Svo var einhver að tala um framfarir í læknisfræði!? Þetta er nú kannski aðallega til að misskilja eða hvað? Þetta er kellíngablogg Hals þessa mánaðar.

Heiðarnar eru samar

2006-05-22T16:40:00.000Z

við sig (ekki Samar!); alltaf er spurt: "Hvernig var heiðin?" Kona í kjallara spyr: "Var heiðin ekki slæm?" Kona sem nálgast lífeyri, sem sennilega er lítill sem enginn eftir að hafa þrifið gólf og stofur á spítlanum áratugum saman. Þrifið vel. Enn eymir af því að heiðarnar voru hinn versti farartálmi á öldum áður. Enn eina ferðina fór Halur vestur í Skagafjörð árla morguns og vildi hafa drjúgan tíma til fararinnar. Veður í raun allt hið ágætasta er komið var rétt neðan við hæsta punkt, rétt vestur fyrir möstrin á Öxnadalsheiði. Eins og oftast er, versta færið í Öxna- og Hörgárdal, sem og nærri Akureyri. Sól í heiði, nærri vor, en tímabundið, er farið var meðfram Blönduhlíðinni. Engir helsingjar eða blesgæsir, en grágæsir á túnum nærri Miklabæ og vestar, mest kropp að hafa sjálfsagt. Farfuglar líklega áttaviltir. Engin spretta enn í úthaga sagði maður kunnugur Hali og öllu, já öllu í Skagafirði.

Nú er staddur í bænum

2006-05-21T12:44:00.000Z

maður nokkur, sem hefir einn þann allra sérkennilegasta og skemmtilegasta hlátur er Halur þekkir. Halur stóðst ekki freistinguna (enda finnst flestum betra að standast þær ekki en hitt!) þegar hann hitti viðkomandi á tog- og þrekæfingu sem og í sturtu gærdagsins; hann kreisti einn brandara úr sér og þá fékk hann að launum þennan góða hlátur. Þannig er með flesta góða eða ágæta hluti; þeir eru fáum kunnugir og liggja ekki á glámbekk nútímans. Enn betra var það í morgunsundi hvíldardagsins, en Halur rakst þá á sama mann á bökkunum og sagði strax: "Þú bara eltir mig!" Ekki merkilegt það (svona eru brandarar Hals lélegir), en viti menn, hláturinn kom og ekki átti þetta eftir að versna. Nefnilega það, að sundfreyjan í Vinaminni, sem er Hali allnokkrum sundtökum fremri (þótt lögunin gerir Hali einnig erfitt fyrir í samanburði við hana sem er í laginu eins og Guð skapaði sundfólk og fiska sjávarins), kenndi Hali eitt af leyndarmálum sundsins. Ekki fannst henni það merkilegt, en fyrir honum er þetta sennilega upphaf frekari "afreka" milli bakka. Sundveður dagsins var í raun sýnishorn af öllu því sem prýtt getur sumarið; norðankaldi, logn, éljagangur, snjómugga, bylur, sólarbirta, dregið fyrir sólu, skýjafar breytilegt. Síðan heitt kaffi í Vinaminni.

Halur er maður

2006-05-18T15:29:00.000Z

vanans; ekkert kemur á óvart í lífi hans, en margt í annarra; þar eru skemmtilegheitin. Halur er sáttur við þetta, en stöku sinnum kemur lífið Hali í opna skjöldu. Halur reynir að ganga eða hjóla milli staða enda alla tíð þurft að huga að heilsu og þyngd. Undafarið hefur hann hjólað milli staða en nokkuð hauskalt á stundum. Halur fór af stað í morgun sem venja hefir verið á nokkuð gömlum DBS reiðskjóta án dempara eða annarra þæginda nútímamannsins. Það er svo sem ekki í frásögur færandi, en þegar Halur er kominn þangað sem hann réttir jafnan úr sér rétt áður en hann tekur síðustu beygjuna á hælið, verður honum skyndilega nokkuð bylt við. Hann leit upp og reiknaði með að finna skyggni hjálmsins, en hendinni mætti dula eða höfuðfat í tauformi og ekkert annað. Hali tókst að ná beygjunni en þessi viðburður, já viðburður, var honum nærri um megn og því skrásettur hér, enda ekkert sem gerist hjá honum sem nokkur gæti haft ánægju af að heyra. Halur hafði því farið út án hjálmsins, aðeins með duluna á hausnum. Það sem meira er, þá hefur freyjan í Vinaminni sjaldan orðið meira undrandi en sökum þessa. Halur hélt skamma stund að hjálmurinn hefði fokið af hausnum, en svo var nú ekki skv. heimildum heima fyrir. Sjálfsagt er freyjan búin að panta segulómun af haus þess er hjólaði, en sá hinn sami er í stökustu vandræðum með það (sökum vanafestu) hvort hann eigi að leiða reiðskjótann við hlið sér heim á leið ellegar brjóta lög eins og aðrir, þ. e. hjóla og finna fyrir syndinni, syndinni sem hann lærði um í KFUM á sínum tíma. Dulan líkist þó hjálmi og gæti hindrað skráningu í bækur varða laganna, sérstaklega ef þeir væru að snæða á vaktinni, borða kex í bílnum eða leggja sig.

Það er mögulegt

2006-05-12T19:43:00.000Z

að gleðjast yfir ýmsu eins og t. d. því að borða afganga. Það er einnig auðvelt að gleðjast yfir því að eldri sonurinn í Vinaminni fékk rétt áðan viðurkenninguna "mestar framfarir" í handboltanum í sínum flokki hjá KA, sérstaklega eftir að hann var að spá í að leggja boltann á hilluna í haust. Halur hefur fundið í nokkra mánuði að æfingarnar eru farnar að skila árangri; hann þarf að taka "vel á drengnum" ef hann vill ekki sjálfur verða undir. Þannig má sjá að oft er stutt á milli árangurs og hins að leggja upp laupana; þrautseigjan, þolinmæðin og æfingin eru systkini er leiða oft til ágæts árangurs í hverju sem er, svo nokkuð verði alhæft. Þetta minnir Hal á það að iðulega fæst fiskur í "síðasta kasti". Til hamingju með árangurinn segir sá er hér heldur á netpenna.

Sumt

2006-05-10T17:36:00.000Z

hefir Halur átt erfitt með að sætta sig við í málfari fólks; sumt er rétt og annað rangt eins og alltaf. Síðan kemur smekkurinn eða tíðarandinn. Nú á allt að stytta sem mest og helst að skammstafa. Hali er einn kennari minnisstæður gegnum tíðina en sá hinn sami var með klárar reglur og leiðbeiningar hvað snerti íslenskt málfar og sérlega slettur; eina "slettan" sem hann gat samþykkt var heitið bíó!. Orð eins og partí og strætó voru ekki æskileg og fallbeygingar voru einnig afar mikilvægar. Svo er komið að æði mörg orð eru nærri einungis notuð í nefnifalli. Gott dæmi er orðið lítri. Þegar farið er í Brynju og beðið um einn lítra af ís, þá er hvumsað og spurt: "Einn líter, einn líter, líter". Halur þráast við og mun áfram biðja um einn lítra af hvítum ís. Sumar breytingar eru skemmtilegar og sennilega af hinu góða eins og þær að fólk nefnir sig alls kyns nöfnum opinberlega, notar gælunöfn og álíka í stað þess heitis er þröngvað var uppá viðkomandi áður en hann gat haft skoðun á eða annað. Auðvitað er þetta þekkt gegnum tíðina og sérlega í sjávarplássum en hér átt við nýyrði og álíka, ekki bara Jón Gunnu. Þessum útúrdúr er lokið eins og samræmdu prófunum. Engar framfarir í skólakerfinu.

Grasið

2006-05-08T13:05:00.000Z

er ekki grænna hinum megin og allt er vænt sem vel er grænt (eins og Vinaminni og vonandi Vinaminnisgarðurinn eftir nokkrar handunnar breytingar), það hefir sannast undafarna daga. Svo verður á meðan mannfólkið gerir ekki enn meiri usla í lífkeðjunni, háloftum og fjörðum; það er þó eiginlegur "bíóterror" í gangi alla daga þótt ekki sé um bótox að ræða. Einn "góður dagur á Íslandi" er eins og tíu í útlöndum. Sama hvert litið er, það er ekta vortilfinning í lofti þessa stundina. Vorið sleppur iðulega komu sinni norðan heiða, en þetta lofar góðu þótt kuldinn gægist við næsta horn.

Þegar meira er verra, þá er

2006-05-04T17:06:00.000Z

ekkert verra. Ekkert verra veit Halur (eða fátt) en menntahroka eða merkilegheit tengd menntun eða gráðum. Í handraðanum er auðvelt að finna ótal dæmi þessa. Í heilsugeiranum er þetta daglegt brauð. Furðu margir telja þó enn að menntun, hver sem hún er, sé alltaf forsenda eða mikilvægust í leit manneskjunnar að árangri eða álíka, menntun er þekking; svo er nú aldeilis ekki. Hér á Halur sérlega við það sem kallað er "langskólanám" eða það að "hafa próf". Það er svipað með skólagönguna og pappírs- og greinamagnið sem öllum er ætlað að komast yfir daglega. Margir skemmtilegustu og greindustu menn sem Halur hefir nærri komist eru einmitt ekki "langskólagengnir" og hafa ekki examen upp á vasann og fylla ekki þann flokk sem gengur með examen undir hendinni milli staða. Þeir ganga með vitið milli eyrna og milli staða. Þeir hafa hæfileikann til að greina hvað er skynsamlegt að kunna og gera og hvernig megi til dæmis verða til gagns; það er mörgum "langskólagegnum" hulið með öllu. Þegar meira er verra, þá er ekkert verra.

Innsláttarveiki

2006-05-02T15:32:00.000Z

er nokkuð algeng í dag og hefir sjálfsagt verið árum saman ef ekki tugum og hundruðum. Innsláttarveiki eru innsláttarvillur sem fram koma í texta ("teksta") á tölvuöld (tölvukvöld) þegar t. d. hreyfigeta (hreyfingigeta) er meiri en í meðallagi ásamt nokkurri blindu. Það að lesa gögn sem einungis eru til á rafrænu formi, óleiðrétt að mestu, er nokkuð sem kannski fáa hefur grunað hvernig færi og þó. Dómur afkomenda verður eða er klár nú þegar. Innsláttarveikin kemur stundum fram í tali fólks og jafnvel svo að gamlir og góðir bændur, er eigi hafa alist upp við óhefðbundna ávexti eða grænmeti, kalla þá ýmsum skemmtilegum nöfnum; hinn góði bóndi úr hlíðinni lauk samtalinu þannig að hægðirnar væru bara ágætar eftir að hann fór að borða "banana og kívanis"! Sjálfsagt er það ástæðan fyrir streymi fólks í félagasamtök eins og "Kívanis" (þau eru hægðabætandi) en það er þó nokkur spurn með frímúrarana; hvað skyldi þeir nú borða?

Vorvinnan

2006-04-28T10:14:00.000Z

er hafin í Vinaminni en þar er átt við eilífa hringrás náttúrunnar í Vinaminnisgarði, garði sem gefur talsvert af gleði og "slökun", ókeypis já. Slökun er í tísku og hvers vegna þarf alltaf að vera að tala um slökun í hinu og þessu, gott að vera í garðinum og slaka á segir fólk; það er jafn gott að vera í garðinum alveg óháð því hvort um slökun sé að ræða eður ei. Þú ert þar sem þú ert hverju sinni og þú ert það sem þú ert hverju sinni. Fremur ætti að tala um vellíðan en slökun. Síðan væri gott að fara með vorkvæði HKL í hljóði eða upphátt; kannski er það slökun eða ekki slökun, bara slökun ef borgað er fyrir hana í peningum á námskeiði þar sem fólki er kennt að gera það sem allir kunna áður en ef til vill búnir að gleyma. Vonandi ná sem flestir að vera sem mest úti við í sumar enda er það ókeypis.

Hæfileikaleysi

2006-04-24T19:28:00.000Z

Hals er algjört eða fullkomið þegar komið er að því að umbera skipulag hjá þeim er Halur verður því miður á stundum að fylgja eftir ellegar taka tillit til (ummmhh). Skipulagsleysi er eitt af bölum nútímans þegar allt skal vera skipulagt í þaula; betra var það áður í sveitinni eða á sjónum, allt hafði sinn vana gang, það var í lagi þar. Enda er löngu vitað að Halur rekst illa í "hópvinnu". Því er honum spurn hvort hann sé á réttri hillu eður ei!? Skipulag á þeim stað er Halur sækir virka daga til að reyna koma e-u í verk líkist að flestu leyti skipulaginu í bæjum og borgum landsins; allt til bráðabirgða og það reddast. Sagt hefur verið að enginn eigi að éta og skíta á sama stað, en svo er umhorfs í heilsugeiranum hvað varðar skipulag. Annars er best að horfa út í sólina. Halur er uppgefinn á engu og þetta er verra en nokkurt..............."Bráðum kemur betri tíð....."

Vísindin efla (ekki)

2006-04-19T14:28:00.000Z

alla dáð eða hvað má segja um eftirfarandi texta úr dagblaði (!?): "Testósterónmagn í mönnunum var einnig tekið með í reikninginn (með því að bera saman baugfingur og vísifingur - sé sá fyrrnefndi lengri bendir það til mikils testósteróns) og í ljós kom að þeir sem höfðu mest af testósteróni stóðu sig verst í leiknum, og þykir þetta benda til að þeir sem hafa mikið testósterón séu sérstaklega næmir fyrir kynferðislegum myndum.
Dr Siegfried DeWitte, einn höfunda rannsóknarinnar, sagði: „Við teljum okkur allir vera skynsama menn, en niðurstöðurnar benda til þess að þeir sem hafa mikið af testósteróni séu einkar viðkvæmir fyrir kynferðislegum boðum.“ Það þarf engum að leiðast síðasta vetrardag með slíkar upplýsingar. Halur hefur lengi vitað að karlar geta ekki gert tvennt samtímis og því kvað Halur:

Tvennt ei karlar kunna á
og kannski eigi segja má;
að engum hafi tekist
svo hafi kerla á rekist,
samtímis huga- og reðurreisn að ná.

Nei, ekki meir!

Einn er sá

2006-04-19T10:26:00.000Z

dagur sem hefir sérstakan sess í huga Hals. Hann nálgast og tengist tíma þeim er allir vilja hafa sem bestan eða ágætastan. Sennilega hafa fáir dagar meiri þýðingu hérlendis, þótt áður hafi hann verið enn þýðingarmeiri. Hugmyndir eru væntanlega alveg ljósar hjá hverjum og einum hvað sumardagurinn fyrsti þýðir eða stendur fyrir öfugt við t.d. páskana í eiginlegri merkingu eða aðra helgidaga. Væntingarnar eru miklar. Margir sumardagar hafa verið kaldir og hor í nös fylgifiskur þessa dags oftast nær í norðri. Allir hafa meira eða minna rétt fyrir sér sem spá fyrir um veður sumarsins framundan; það verður bæði og sjálfsagt þannig að spárnar eru einfaldar. Ekki ósvipað og spár (niðurstöður) hinna nýríku skoðanakannanaímyndarmótanditækifærishyggjufyrirtækja sem hérlendis sem erlendis hafa risið upp á hæsta stall og notuð eru af öllum sem þurfa að panta "rétta skoðun" í umræðunni. Síðasti vetrardagur hefir einnig mikla þýðingu enda liggur hann næstur hinum ágæta fyrsta sumardegi.

Einlyndi

2006-04-18T14:52:00.000Z

í skoðunum er Hali eigi að skapi. Því finnst Hali ljóst að lýðræðið hafi undir lok liðið í núverandi mynd. Hvernig má það vera að skoðanir manna almennt talað, á hinum breytilegu þáttum lífsins, rúmist t. d. innan þess sem kallað er því sérkennilega nafni, stjórnmálaflokkur. Slíkir flokkar stefna að einræði, en ekki lýðræði. Illa er fyrir þeim komið (telur Halur) sem sættast á allar meinsemdir eins og sama stjórnmálaflokks í skoðunum, hverjar sem þær eru hverju sinni. Halur mun því hér og með línum þessum hætta öllum afskiptum með penna eða öðru sem að slíkum flokkum lítur og pólitík einnig; allt er betra en það. Nóg var nú samt komið. Ekki ósvipað er að halda með íþróttaliði og vera sáttur við allar gjörðir þess innan vallar sem utan (leikmenn jafnt og annað) svo lítið dæmi sé nefnt úr daglega lífinu; hins vegar má alveg "lifa með slíku".

Gamalt fólk, aldraðir

2006-04-17T18:03:00.000Z

eru ekki leiðinlegir eða þreytandi, það hefur iðulega sannast hið gagnstæða. Sjaldan reynir Halur að horfa á íslenskar myndir en það gerði hann í gærkveldi enda ekki alveg sofnaður um áttaleytið (Halur er aldraður); nýbúin að vera kreppa í mat, en hann mettur þó. Hinir öldruðu vistmenn Hrafnistu voru sannarlega ekki með nein leiðindi, en ekki er þó allt sem sýnist er aldurinn færist yfir. Hins vegar benti húsfreyjan honum á þátt "Bergs" nokkurs meðal aldraðra. Hann var allt í öllu, en á sama tíma var því velt fyrir sér hver hin eiginlegu "laun" hans væru fyrir allt er hann gerði fyrir aðra. Sjálfsagt ekki til að þenja veskið ef mið er tekið af launum þeirra er sinna öldruðum þótt e-r undantekningar séu örugglega þar á. "Laun" eru afstæð, en allir þeir er hjálpa öðrum eða greiða gera og gleðja, hvað þá öldruðum, þeirra laun verða ekki reiknuð í aurum eða krónum.

Grágæsir

2006-04-16T19:22:00.000Z

á flugi voru Hali sýnilegar er hann gekk með bæklinga húsa á milli í dag; fyrsta merki vorsins hjá Hali og styttist því í fuglaskoðun vorsins og veiði ef almættið lofar (Guð); Guð er enginn skyndibiti eins og álver eða virkjun. Svipað er með álverin og skyndibitann; eftir að búið er að kyngja (bræða), þá er best að flýta sér á salörn. Halur hélt ekki að hann ætti eftir að lesa bók á íslensku (með innihaldi) er fjallaði um brennandi málefni en það hefir hann aldrei þessu vant gert, en það er auðvitað "Draumalandið" og að nefna hana er náttúrulega aðeins klisja. Kannski er hún eins og textar Becketts, allir eiga en enginn (of fáir) les(a); eða Íslendingasögurnar. Stal nokkrum setningum úr Gísla sögu um daginn, þær voru sannar og eftirminnilegar. Það stendur þó ekki til að búa til lón í Glerárdal, hann var kaldur á köflum í gær. Páskarnir eru eftirminnilegir fyrir það sem ekki varð, en svo er með marga hluti. Halur heldur þó sínu striki.

Gleði og ekkert annað

2006-04-10T12:21:00.000Z

er á dagskránni í Vinaminni. Hali var bent á það að svona langt páskafrí eins og er í skólum hérlendis væri bara af hinu góða fyrir börnin; satt er það. Ekki þarf húsfreyjan í Vinaminni styttra frí en börnin (hér er ekki átt við Hal). Síðan á eftir að borða páskaeggið sem kötturinn Máni vann í happadrætti KA drengja nýverið. Skíði, snjór og e-r sól í heiði er framundan; það sýnist Hali ef gáð er utan við óbrotinn glugga. Best að hætta þessu kellíngabloggi.

Forkastanlegar

2006-04-09T17:50:00.000Z

skoðanir eru Hali ekki fjarri almennt talað. Halur hefur lengi haft "forkastanlegar" skoðanir á skólakerfinu, en ekki kennurum í sjálfu sér enda þar víða valinn maður þó ekki sé í horni hverju. Einna verst er ástandið með stúlknagerviseringu skólakerfisins, lítilsgildingu íþrótta, heyfingar, lista, myndmenntar, teikningar (skemmtilegasta fagið í skólanum eða gat verið svo) og utanbókarlærdóminn, en þetta liggur alla leið gegnum kerfið og út um endagörn háskólanna. Halur gladdist því í dag er í heimsókn kom í Vinaminni, íslensk kona, búsett vestanhafs, heimskona, gift heimsþekktum manni í jákvæðri merkingu (en ekki á Íslandi), sjálf með skoðanir og svo óvænt sem það í eyrum lætur, líkar þeim er Halur hefir á skólakerfinu. Enn ánægjulegra var nú það að Halur gróf nýlega upp gömlu symfóníuna um skólakerfið og þjóðfélagið almennt með meiru á eigin fótaspilara, sem allir eiga, gömlu góðu P. Floyd hlóðgervin sem hafa elst ótrúlega vel, en sumir þola eigi. Eftir 12 ára aldur hefir Halur meira og minna verið í andstöðu við kerfið, einnig skólakerfið og umhugsunarefni hví hann lenti eigi utan alfaraleiðar á tíma þeim eða síðar. Ekkert er auðveldar en það í skólakerfinu, bara orðið segir allt sem segja þarf, skólakerfið. Kannski höfðu pönnukökurnar með kaffinu þessi góðu áhrif á gestinn og Hal? Bara fjandi góðar pönnukökur og ekki var kaffið síðra.

Að gera hlutina

2006-04-09T08:16:00.000Z

í fljótheitum getur verið tvíbennt mjög ef ekki meira. Halur þarf í raun aldrei að gera neina hluti í flýti, því hann hefir allan heimsins tíma til allra hluta. Verkkunnáttufátækt er þó ofarlega á baugi, enda tókst honum nýlega nærri samtímis að dást að grýlukertum og síðan brjóta þau ásamt glugga einum sem hann vissi eftir á færi örugglega svo ef ýtt yrði á kertin. Hann friðaði samviskuna með því að betra væri að ein ónýt rúða færi á haugana fremur en einhver manneskja, jafnvel barn, yrði fyrir grýlu í kertalíki. Auðvelt var að fá samviskufriðun þar sem páskar eru í nánd. Nú er bara að finna einhvern atvinnulausan smið á landinu sem skellt getur nýrri rúðu í gluggann.

Atvinnulausir

2006-04-07T11:23:00.000Z

á Íslandi hafa löngum haft afar neikvæða ímynd í þjóðfélaginu. Verri jafnvel en geðsjúkir eða fatlaðir. Þótt þeir hafi ekki opinberlega verið kallaðir aumingjar þá lætur það nærri. Áhrif atvinnuleysis á einstaklinga og ættingja eru óteljandi. Nú á að bæta um betur með nýju frumvarpi þar sem m. a. má lesa úr skv. blöðum þetta: "Hinn atvinnulausi þurfi að vera tilbúinn að taka starfi hvar sem er á landinu, án nokkurra fyrirvara og hvort sem um fullt starf, hlutastarf eða vaktavinnu sé að ræða. Að öðrum kosti teljist viðkomandi ekki í virkri atvinnuleit. " Þetta væri nú kannski eðlilegt orðalag fyrir iðnaðarráðuneytið eða glæpafyrirtækið Landsvirkjun, ekki aðra. Ríkisvaldið er stærsta opinbera vandamál lýðveldisins; það sniðgengur lög og rétt og mannréttindi eru brotin daglega jafnt í orði sem á borði.

Stöku sinnum

2006-04-03T14:40:00.000Z

fer Halur í laugar innanbæjar; laugar utan alfaraleiðar (utanbæjar) hafa ætíð heillað hann meira. Skýringarnar eru augljósar, en helstar þær að sundbúnaður er af skornum skammti, skýlan sveitó og tæknin engin. Bæta má við útliti en því verður ekki gerð nánari skil. Einnig er alltof langt bakka á milli. Halur vill breytingar og kvað:

Sjaldan Halur synda fer,
sjálfsagt vita allir hér.
En sökum þreytu
og þrálátrar bleytu
þráir hann í lauginni sker.

Skuggi

2006-04-02T17:26:00.000Z

hefur margar skírskotanir (hjá Hali). Skuggi er t. d. þekkt straumfluga meðal útvalinna og myndasöguhetja svo nokkuð sé nefnt. Síðan eru ýmis orðtök honum tengd eins og að vera í skugganum, vera í skugga af sjálfum sér, skugga annarra, skugga fjölskyldunnar, skugga ættarinnar eða ættingja. Halur fór á listsýningu í dag og taldi sig þá og þar vera að fara á sýningu ákveðins listamanns, en viti menn; þegar að var komið, þá var um allt annan mann að ræða, en sá hinn sami er þá í skugga nafna síns eða hvað? Hvor er í skugga hvers? Halur er alltaf í skugga sjálfs síns. Sýninguna mætti nefna skuggasýningu. Allt er meira eða minna í skugga síbylju og endurtekningar. Á þessum árstíma er mikið um skuggaspil.

Hrein íslensk

2006-03-30T11:05:00.000Z

leiðindi eru sitthvað. Halur er t. d. ágætt leiðindadæmi, karlpungur, stundum hálfgerð kellíng, jafnvel með kellíngabloggtilhneigingar, öfundsjúkur sjálfsagt, borðar All-Bran alla daga, hægðir í sama stíl, ekkert kemur á óvart hjá honum eða með hann. Dæmigerður úlpumaður með húfu. Halur er maðurinn, sem þú forðast og ferð hringinn þegar hann nálgast. Hann kann þó á ryksugu og getur sett í uppþvottavél, jafnvel tekið úr henni.

Tveir

2006-03-28T21:03:00.000Z

menn, karlmenn, komu inn í litla búð sem er ein af fáum minjum kaupmannsins á horninu ekki alls fyrir löngu. Halur var í búðinni og með húfu. Þessir komu í taxa og voru í svörtum regnfrökkum, terlínbuxum annar en dením hinn, miðaldra og í meðallagi þéttir á velli, glaðlegir og litu í hillurnar. Þeir spurðu um tannbursta og tannkrem en vantaði einnig rakvél og jafnvel sápu. Þeir lyktuðu af spíra eða alkóhóli, þó ekki gífurlega. Nefstærð Hals er talsverð en einhverjar skemmdir samt þegar orðnar hvað lyktarskyn snertir finnst honum. Það er undantekning ef Halur rekst á slíka menn í dag, en þetta var algengara áður. Betra hefði verið ef almennileg kona (ekki Halur) hefði verið stödd í búðinni og tekið þessa tvo uppá sína arma eða jafnvel bara annan þeirra; því þurftu þeir á að halda. Hurfu síðan aftur í taxann og voru áfram glaðir. Þeir hættu hins vegar við að kaupa tannburstana þar eð tannkremið fékkst eigi; vildu kaupa allt í einu á sama staðnum. Halur hélt út á vit óvissunnar og vínleysisins. Hans beið tannbursti og tannkrem fyrir nóttina. Eins og sjá má af þessu, þá gerist ekkert hjá Hali sjálfum sem fréttnæmt má teljast, allir dagar án tíðinda. Halur hefði betur verið í drag þetta kvöld. Hann á t.d. grænan útivistarjakka sem væri ágætur drag-jakki heldur hann.

Vatn

2006-03-26T19:38:00.000Z

er víða af skornum skammti. Það flaug í huga Hals er hann snæddi kvöldverð, hversu mikil gæfa það væri að eiga vatn í eða úr krana. "Vatn er vökva best" sagði vinur Hals á sínum tíma. Vatnið á Akureyri er frábrugðið vatninu sunnan heiða; í norðanvatni er mikið loft eins og sagt er enda norðlenskt vatn. Sunnanmenn hafa gert athugasemdir við vatnið í Vinaminni og varla viljað drekka það í fyrstu. Heita vatnið er einnig allt öðruvísi. Halur er í vafa hversu lengi hann nær að skrúfa frá krana eða drekka vatn úr læk í náttúrunni. Orsökin er virkjanastefna ekki-lýðræðisríkisins Íslands; það mun koma að því að vatn mun hætta að renna úr krönum landsmanna ef mið er tekið af virkjanbábiljustefnunni sem tröllríður norðansveitum, hvað þá austansveitum þegar. Vatn á Nýja-Sjálandi mun vera tært, það hefir Halur lesið í veiðilýsingum fremur en skyggnilýsingum.

Syndaaflausn Hals

2006-03-24T20:09:00.000Z

var fólgin í því að hlusta á "Chocolate Jesus" með T. Waits, kannski ekki hans þekktasti söngur eða dýpsti texti spúsunnar, en sætur Jesús er örugglega betri en ýmsir aðrir. Leynir á sér innan um hænur, hörpu, bassa og gítar að ógleymdum barka meistarans sem fáum líkist. Það sem meira er, þá er eldri sonur Vinaminnishjóna farinn að gjóa eyrunum að slætti Waits. Það hlýtur að vera á við fimm fermingar. Trúarskírskotun víða í tónum og tali.

Jesús

2006-03-23T14:02:00.000Z

Kristur er orðinn bankastjóri í Landsbankanum; ekki er annað að sjá á netauglýsingum bankans. Kemur þetta Hali eigi á óvart þar sem fermingin er orðin eitthvað sem enginn veit; varla neinu skárri á ungdómsárum Hals, það er öruggt. Ferming þýðir staðfesting, en þar staðfestir "barnið skuldbindingu foreldra og guðfeðgina í skírnarathöfninni". Halur telur víða framkvæmd mannréttindabrot, en ferming á þeim aldri sem á Íslandi er viðhöfð, er lítið annað en mannréttindabrot í eiginlegri merkingu. Það er ekkert nýtt að kirkjan skuli fremja slíka glæpi. Halur styður þó öll góðverk (góð verk) og boðskapurinn er margur hver mannbætandi.

"Trúarstaðfestingarfjármagnsfjárfestingarhlutabréfainnlagnarupphæðartalningarlota" nefnir Halur ferminguna, en fyrir þetta fær hann sjálfsagt skammir í húfu eins og svo margt annað. Hann mun því eigi aðhafast neitt frekar þessu tengt. Viðbót, letur minnkað í samræmi við innihaldið.

Skagafjörður

2006-03-22T20:59:00.000Z

er ætíð tilefni vangaveltna. Halur hefir alla tíð verið hugsi (hugsa sér) yfir heitinu Blönduhlíð í Skagafirði og hví nafnið væri ekki betur sett í Húnaþingi. Blönduhlíðin er iðulaga afar falleg þegar farið er um Skagafjörð og oft hefur Halur verið hugsi yfir Örlygsstaðabardaga sem háður var árið 1238 í ágústmánuði þann 21ta. Þar voru þrjár voldugustu ættir landsins á þeim tíma á vígvellinum, Sturlungar fóru halloka. Þegar komið er úr vestri nærri Víðivöllum og áður en komið er að Miklabæ, má sjá skál milli tveggja fjalla í hlíðinni, eiginlegt leiksvið sem er hálfhringur, nærri dreginn með sirkli ef vel er að gáð. Þetta eru hálfgerðar dyr, dyr til þeirra sem hurfu í kjölfar Örlygsstaðabardaga hugsar Halur sér. Þær loka sér þegar farið er austar.

Ýmissa grasa

2006-03-19T19:48:00.000Z

kennir í skýli því er hýsir m. a. frúarbílinn í Vinaminni. Margt hefir bæst við í vetur og margt er unnt að gera í skýlinu eins og herskýlunum forðum, með eða án skýlu. Nú er mögulegt að fara í bað, jafnvel með nuddi, láta sprauta á sig köldu eða heitu vatni, háþrýstiþvottur á erfiða og leynda staði getur hjálpað enda tiltækur í skýlinu. Ómlist, tónlist, hljómlist, lifandi eða úr tækjum er á staðnum. Síðasta undratækið sem kom í skýlið er skoðunarbekkur kvenna sem liggur í vari neðan skíðafestinganna, nærri skíðaskónum og stöfunum. Þannig að litlu er við þetta að bæta og aðeins ímyndunaraflið sem setur þeim skorður er í skýlið fara.

Forlagatrú

2006-03-17T13:34:00.000Z

er mörgum töm og Halur telur að hún sé langt því frá gengin til feðra sinna þótt meira hafi verið um hana fjallað á öldum áður. Örlagatrú, forlagatrú. Halur hefur til ráðstöfunar 35 cm breiðan og 190 cm háan skáp á fjórðungshælinu, þar sem hann getur kastað af sér þyngri klæðum og farið í léttari. Nokkuð ryk var í botni en auk þess var krónumynt í hæ. neðra horninu. Skápurinn var þrifinn af þeim sem betur kunna, en viðkomandi tjáði Hali skömmu síðar að krónan hefði verið skilin eftir á hillu í skápnum. Svo fór að Halur tók krónuna og kom henni fyrir í hæ. neðra horninu. Þar mun hún sjálfsagt safna einhverri ávöxtun í formi ryks.

Umhverfisstefna

2006-03-15T19:22:00.000Z

er skrítið fyrirbæri. Halur reynir að vera vist- og umhverfisvænn eins og honum er framast unnt, en sumt skilur hann ekki, kannski margt þó heldur. Það fást ekki enn umhverfisvænar bifreiðar sem eru 4x4 nema í verðflokki utan alfaraleiðar, svipað gildir um hinar. Halur byrjaði að hjóla í dag á þessum vetri enda tíðarfar einstakt og birta þegar að morgni. Tók DBS reiðskjóta út í gær, pumpaði í dekkin, athugaði bremsurnar og allt sýndist í lagi síðan í fyrrahaust. Stór hluti hverrar borgar er heltekinn umferðarmannvirkjum, brýr, krossar, 2-4 faldar akreinar í allar áttir, ljós og merki en samt eru 30 km skiltin spöruð í íbúðahverfum. Það er undarlegt að þessir er aka vilja ætíð stystu leið, vilja fá tengingar milli hverfa eins og á Akureyri, jafnvel á skólalóðum grunnskóla, skuli yfir höfuð hafa einhvern hljómgrunn. Hvers konar byggðarlag er það þar sem tengibrautir hafa forgang fyrir þá sem telja sig þurfa að komast innanbæjar í smábæ eins og Akureyri innan 3-5 mín. í stað 5-8 mín. eða álíka? Halur veit það alls ekki. Hvernig má það vera að slík stefna hafi yfir höfuð einhvern málssvara í dag, en ef Halur horfir í kringum sig, þá er það augljóst þar sem meirihluti fer milli staða í bifreiðum þar sem annað hvort má hjóla eða nota tvo jafnfljóta. Ekki batnar það með stóriðjunni; hvers konar orðskrípi er það eiginlega?

Einn er sá lundur

2006-03-08T16:49:00.000Z

sem geymir eða hýsir fólk af ýmsu tagi. Lundurinn er staðsettur innan gamallrar, fyrrum kaupfélagsbúðar á Akureyri. Þarna er fólk sem flust hefir búferlum, fólk sem áður bjó í sveitum en býr nú á mölinni, fólk sem komið er á ellilaun (ef það þá hefir einhver), fólk sem fæst er að spá í hlutabréf eða ríkidæmi fjárhagslegt ef skönnun Hals er rétt. Þarna eru bæði karlar og konur og þarna má lesa dagblöð, spjalla og fá sér að borða, eiginlega gera hvað sem er. Raunveruleg félagsmiðstöð á gömlum grunni kaupfélagsins sem er farið, horfið. Þessi lundur heitir Hrísalundur.

Ellin

2006-03-07T19:41:00.000Z

er merkilegt fyrirbæri; því fylgir alltaf ánægja að hitta aldrað fólk, fólk sem segir margt í fáum orðum og þegir og hlustar, öfugt við Hal. Það eru forréttindi að hitta aldraða alla daga meira og minna í starfi og leik. Aldraðir eru sérstakir og aldraðir flugmenn einnig. Eitt sinn lært að fljúgja og þá kann maður það þar til yfir líkur. Spitfire vélin fræga og fallega er klassísk að öllu leiti og henni flaug tíræður Breti í tilefni afmælisins, en vélin ku vera á svipuðu reki og flugmaðurinn. Þannig sjá allir í hendi sér að aldraðir hlutir jafnt sem einstaklingar eru nokkuð til að taka eftir og bera virðingu fyrir. Að læra að fljúga er svipað sennilegast og það að læra að veiða; alltaf jafn ánægjulegt á meðan það er mögulegt.