Breytingar
eru ætíð erfiðar fyrir menn eins og Hal sem illa er haldinn af hreinu iðjuleysi, þótt hann fái stund og stund að fylgja vini sínum í vinnu. Miklar breytingar hafa orðið á vinnutilhögun vinar hans og erfiðar eru þær Hali sem haldinn er ýmsum gamalmennasjúkdómum. Halur hefir átt í nokkrum erfiðleikum þennan morgun að ganga örna sinna sökum símans sem sí og æ, á hann kallar þegar síst skyldi; hann er vart farinn út þegar hann er kallaður inn aftur til að fylgjast með verkum vinar síns! Um er að ræða kvenkynsraddir honum framandi. Tekið skal fram að Halur hefur lánssíma til afnota stöku sinnum, en slíkar fjárfestingar sem símtæki eru honum fjarri. "Hann er kominn inn" (hvert?) heyrist gjarnan frá tólinu hinum megin og af þessu tilefni fann Halur uppá því í iðjuleysi sínu og algjöru ábyrgðarleysi, að kasta fram ambögu þessari:
Fræðingar símann frjálslega brúka,
framar nær´ann vart að kúka.
"Hann er kominn inn" þær kalla
kerlur vart með öllum mjalla
af kamrinum Halur þarf að fjúka.
Halur sér enn fyrir sér blómaskeið kamarsins vestur á nesi, en sá var byggður á haughúsi og enn betri varð hann þegar stóllinn var einn eftir í kjölfar fárviðris.
Halur mun hins vegar halda sig í túninu heima á næstunni áður en hann ræðst í frekari skrif.
posted by Halur Húfubólguson @ 14:54
2 comments
2 Comments:
Furðulegir eru staðirnir sem kalla fram minningar hjá Hal(i). Og víst er að ekki dvelur hann við skjáinn að gamna sér við áhorf á hina misjafnlega skemmtilegu og fræðandi þætti á RÚv. Á skjánum sem gamlir menn eins og hann ólust upp við að rýna í gegnum í NB! - öllum veðrum og sáu sjaldnast út fyrir neitt - alveg sama hvernig veðrið var. Og ekki þurftu þeir halir að óttst INNLIT-ÚTLit á meðan þeir gengu örna sinna eða að setan væri ekki nógu fín eða flísarnar gljáandi. Nei þeir skitu alltaf jafnvel í öllum veðrum og höfðu engar áhyggjur af fínheitum sínum. Og vafalasut hvarflaði það ekki að þeim að orðið skjár yrði nokkru sinni að skammaryrði á móðurmáli þeirra eða orðið kamar gæti nokkru sinni komist upp að hlið þess eins og Helgi nokkur Hálfdanarson lagði til einu sinni að orðið kamar sem oftast er á víðavangi kallaður hreinlætisaðstaða (erfið staða það) yrði notað um skrifstofu forstjóra ís tað einkaskrifstofa. Forstjórinn er á kamrinum; gerið svo vel að hitta hann þar.
Halur þakkar gott komment og réttmætt, sjálfsagt mun hann gera hugmyndir þær er þar fram komu að sínum með tíð og tíma. Hið sama ættu fleiri að íhuga.
Skrifa ummæli
<< Home